HKGalden財經臺
發表文章發起投票回覆
【黑鏡線索】初創燒錢二三事
https://hk.lifestyle.appledaily.com/lifestyle/daily/article/20181227/20577398

【黑鏡線索】初創燒錢二三事

2018-12-27
Technology


Google唔係因為有免費員工飯食而成功,而係因為成功所以提供免費餐。

【黑鏡線索】上個月講送餐初創Plum宣佈財困大裁員,提到幾個月蝕幾千萬,唔係非常出奇,因為多錢嘅蝕多啲,少錢嘅蝕嘅額細啲,本質都係一樣。朋友問關於呢一點可唔可以講多兩句,今篇就講仔細啲。

好少聽多錢嘅人,買手袋買到冇晒錢,但係買金融產品買到出事嘅就時有報道。即係話,多錢嘅人,喺面對買手袋買到窮呢方面,比起少錢嘅人有明顯強啲嘅抵抗力,但係喺迷債方面,優勢就冇乜。

手袋同迷債最大分別,唔計乜嘢投資vs消費嘅心理,係買手袋買多到某個點,人本能會自覺真係買得幾多吓,例如買到成間屋都係手袋,行都行唔入嘅時候,點都會懷疑自己會唔會有少許過份。但係對住一啲冇實體嘅嘢,人嘅防範機制就唔係好發揮到,畢竟一億嘅迷債,唔會比一萬蚊嘅迷債阻碇好多。

初創燒錢,似迷債多過似手袋。錢既然籌咗,就係籌來燒,籌一百燒一百,籌一萬燒一萬,既然Plum籌咗幾千萬,佢燒幾千萬就唔係好出奇。當然,通常每一輪都會有個跑道預算,一般係十二至十八個月,三幾個月就燒完,的確有啲特別,假設唔係儍嘅,一個可能,係話事人預咗本來會再有錢入,點知筆錢臨時甩轆,失咗預算。

廣告

燒錢請好多人易出事

如果初創燒錢,好多時係燒咗喺請人方面,而人係好明顯有實體嘅,咁點解人嘅本能防範機制發揮唔到?

一個原因,係好多時,話事人直覺,係人越多越勁。既然Google、facebook咁多人,又咁勁,即係人越多代表越勁。問題係,賺好多錢所以有錢請好多人,同燒好多錢請好多人,係兩回事,更唔代表請多人就會變勁,通常係勁咗之後有錢就請多咗人,就好似Google唔係因為有免費員工飯食而成功,而係因為成功所以提供免費餐,不過當然報道嘅時候唔會咁講。當話事人覺得人越多越好,咁防範機制就當然唔會發揮到警報功能。

尤其容易出事嘅,係實效唔係咁容易量度清楚嘅部門。容易計清楚嘅部門,例如銷售部,如果擴充過度導致回報差,問題會好明顯,就算話事人假大空,都多啲機會焗住面對。但係當牽涉例如編程部門,回報唔容易除番人頭量化,點樣衡量人太多太少,就非常之考功夫,甚至可以講,呢門功夫嘅高低,就係編程部主管高手同低手嘅分野。當個主管一心一意,不惜公司工本咁去擴大自己編班,自己嘅山頭,就係災難嘅開始。

睇番有關Plum嘅報道,似乎燒最多錢嘅,係去國外多個城市擴充,以上講嘅因素,似乎唔係主因。不過事實係,喺初創界別一個見唔少嘅現象:初創話事人自覺公司既然係科技掛帥,就當然要容忍/容許編程部主導,尤其喺人手預算方面優先,而編程部貢獻又唔容易量化,再加上有個以越管越大條team嘅為事業目標嘅主管,結果燒到公司五勞七傷,甚至執埋先收科,不可不引以為戒。

撰文:宋漢生
Good0Bad1
2018/12/27, 7:42:22 晚上
引用快速引用
本貼文共有 1 個回覆
#12019/01/05, 9:44:09 晚上
引用快速引用
發表文章發起投票回覆
請先登入以發表回覆