https://hk.news.appledaily.com/local/daily/article/20181214/20568450

西環集中營：律政司怕出事無膽搵意見 - 季陶


前特首梁振英收取UGL 5,000萬元，律政司稱沒有足夠證據作出檢控。


律政司前日正式公佈不對前特首梁振英收取UGL 5,000萬元作出檢控，理由是沒有足夠證據。他們對林鄭月娥政府放生梁完全不感意外，但有熟悉廉署政界人士直言，以沒有足夠證據為由放生梁振英，卻是可圈可點，「因為某程度嚟講，夠唔夠料做（梁振英），取決於廉署、甚至政府有幾積極，如何界定夠唔夠證據，律政司亦有好大空間」。

該政界中人指，2016年時任署任執行處首長李寶蘭突然遭取消署任，李更離開廉署。當時民主黨曾召開記招，何俊仁引述「有力消息來源」，指廉署一直要求特首辦及行政會議提交有關梁振英有否申報UGL 5,000萬元資料，但遲遲未收到回覆。他亦聽聞廉署向梁振英等相關人士索取資料亦有難度，「如果挖唔到任何新資料，單靠已公開資料，就梗唔夠證據」。所以他說廉署用甚麼心態去調查，亦相當重要，「睇廉署高層用乜心態查梁振英案，如果好似許仕仁案咁，由唔夠料一路追到夠料做；如果只係走過場式按章辦事，跟程序都唔夠料就close file，結果已經可以完全唔同」。

至於律政司稱沒有夠證據起訴梁振英，有法律界人士更直言，律政司根本是不敢找政府以外法律意見，「呢類案問其他大狀拎法律意見，真係唔排除政府搵嘅英國御用大狀話可以告，咁律政司到時點算？最好方法就係唔搵獨立法律意見，律政司話唔告就唔告」。不過他直言今次律政司有違一貫做法，明知案件敏感、又涉及公眾利益，仍堅持「說了算」，等同再向國際社會示範「一國兩制」不存在，「所以林鄭唔好再話跟足規矩做野，今次好明顯無」。

季陶
周一、三、五刊出



上一則
上一則
郭紹傑被捕　團體促日放人

下一則
下一則
蘋人誌：賣菲林給王家衛的人　區紹熙