https://hk.news.appledaily.com/local/realtime/article/20181206/58999509?fbclid=IwAR0fP3u4MYEVGue7MLd0jjjOT2I9aZFsKAy5StZEuzzZQlyCrJu8TccGygU

過咗咁多年，好多人都知道有龐大資源嘅建制派，喺派蛇齋餅糉方面相當出色。之但係派嚟派去都係油、米、餅，再唔係，過時過節派吓埋月餅、年糕、糉等，派嗰個唔悶，收嗰個都厭喇，係咪先？有見及此，屯門區議會主席梁健文相當有新意，直頭派車！

不過大家定啲嚟，梁健文派嘅，當然唔係私家車，只係一般手拉嗰啲買餸車啫。之不過佢一係就唔派，一派就係幾百架咁，用大貨車運去屯門湖景邨派。八方問過喺當區做社區主任嘅周啟廉，佢話架大貨車，噚日朝早11點就到，落貨、拆箱、組裝，搞到下晝2、3點先派，一派又派咗個幾鐘。

老老實實，派手拉車確係幾特別，但又唔算係首創嘅，事關八方記得，N年前西貢區議員方國珊都派過，仲幫架車改咗個名叫做「幸福手拉車」。周啟廉就話，梁健文唔單止派車㗎，之前仲派過花灑、燈膽、水龍頭之類家居用品，當然食物都唔少啦。

八方都搵過梁健文了解吓，可惜佢無回音。周啟廉就話，佢上網睇過，一架手拉車平極都要90幾蚊，佢就真係冇咁疊水，可以派90幾蚊一份嘅禮物，但佢會憑服務取勝，例如梁健文派嘅手拉車壞咗，佢負責整，街坊想拆咗車上梁健文嘅招牌，佢幫手拆，更重要係，自從佢喺當區做嘢後，梁健文派嘢都多咗、密咗，難怪佢話有街坊都同佢打氣啦。