見到咁多藝人為電視發牌不公忍唔住出聲，我好好奇──咁國教、僭建、雙非、普選佢地就忍得住？

係一個個藝人大義凜然咁走上街頭大鬧政府不公不義既同時，有一個唔係太多人中意聽、有啲un耳既現實：如果唔係火燒後欄既話，佢地當中有幾多人會參與社運抗爭？

係新聞報導睇到一個HKTV員工話，因為今次政府黑箱作業，考慮參加佔中。咁即係如果發咗牌，佔中爭普選他就無興趣啦？

唔洗等到他朝君體也相同，國教、僭建、雙非、普選，咁多位藝人，講我聽，你們當中有幾多人有為呢啲事就算係表個態都好？定係事不關己己不勞心？唔好話國教雙非普選關佢地咩事，他們係藝人但都係香港人

唔影響自己就討厭政治，燒到埋身就大家都係香港人幫幫手，呢個世界無咁便宜既事。唔好再話咩要搵食拍劇返工，講我聽，今次上街果十二萬人邊個唔洗返工返學唔洗搵食為兩餐奔波？

講呢啲唔係搞分化，前事不必記，只係從今以後，希望呢啲藝人記住曾經有一日，至少有十二萬香港人上街同你們共同進退吶喊過。當有一日，呢班你大概唔會知道佢叫咩名既香港人處於危機既時候，唔好再搵啲狗屎垃圾藉口左閃右避、含糊其詞，請好似今日一樣，比啲勇氣企出來，記住，你地都係香港人