立法會九龍西補選今個星期日就舉行，民主派同建制派均出動知名人士幫手拉票，其中建制派出動警務處前處長、有「禿鷹」之稱的曾偉雄，今朝喺黃埔為陳凱欣拉票時，就同幫民主派代表李卓人拉票的香港眾志黃之鋒「冤家路窄」撞到正。

黃之鋒喺facebook話，今朝喺黃埔幫李卓人拉票期間，發現現為全國政協的曾偉雄、建制派議員田北辰，均有現身為陳凱欣助選，黃之鋒話：「估唔到，連前警務處處長曾偉雄都落左嚟，喺佢任內嘅警隊完全採用鐵腕管治，當年被佢拉左咁多次，終於見到佢真人。」

黃之鋒又話，「不過睇嚟佢（曾偉雄）唔係好慣拉票，啲面部表情都有啲生硬，仲有街坊問我嗰個係咪馮檢基，可能髮型有啲似。」

除咗黃之鋒一早現身為李卓人拉票，公民黨黨魁「岳少」楊岳橋，噚晚喺立法會開完大會後，亦再為李卓人助選落區，親力親為將李卓人的單張送入選民信箱，都算認真唔話得。

補選其他候選人包括馮檢基、伍廸希和曾麗文。

https://hk.news.appledaily.com/local/realtime/article/20181122/58943426