位於中環威靈頓街六十四號的裕榮大廈地舖，原本由南華前班主羅傑承兩位千金搞的「來佬餐館」以$70萬承租，之後加到＄110萬，但去年印度人業主話打算重建成幢大廈，「來佬」被逼離開玩咗六年嘅中環舖，搬到灣仔去。

去年鋪市處於瘋狂之癲，好多業主趕走租客，都係想大幅加租，不過呢個鋪位空置一年有多，最近卒之有間叫「中環茶記」嘅茶餐廳承租，嘩……租金竟然係$18萬，咁平嘅條件係租客冇免租期之餘，仲要負責裝修呢幾層舊樓，租約只簽四年; 較一般六年為短，不過都可以講係海嘯價，工人現正如火如荼在裝修，「中環茶記」老闆是持有龍皇集團（8493）7.5%的李榮燊。

呢個海嘯價，可以作爲中環舖租的寒暑表，一年之間簡直天堂變地獄，有位中環業主聽到都話:「呢個時勢，我個租客份約到期都要預佢劈我一半租金啦！」

2013年以$4.5億購入這幢物業的業主也不是省油的燈，對香港物業市場瞭如指掌，他就是香港五十大富豪之一的印度Chellaram家族, 早年在印度經營紡織，後來涉獵船務，可謂見慣風浪，20年前在倫敦成立地產投資公司Mordril，投資物業遍佈英國，印度及香港，仲揾咗以前太古地產CEO蒲祿祺出任非執董。印度人出名數口精，鋪位掉空一年多後，終於要面對現實，劈到$18 萬租出，租約九月一日簽下，如果遲一個月經歷十月股市大跌，可能連＄18萬都保唔住。呢份租約，可以説是中環鋪市海嘯的第一浪！

撰文：宗菁華






https://hk.lifestyle.appledaily.com/nextplus/magazine/article/20181117/2_638117_0/-每日壹爆-中環鋪租冧價8成-業主大逃亡-威靈頓街-110萬月租劈到-18萬