年度大型戶外音樂節Clockenflap喺到第二日嘅晚上，重頭戲當然係英國樂隊Pulp前主音Jarvis Cocker嘅演出，李健宏（KB）今晚就陪外籍朋友到場，問KB今晚嚟支持邊個單位？佢話：「今晚主要係陪朋友嚟，聽晚我會再黎睇Roni Size，係DJ嚟，由細鍾意到佢大㗎啦。」

Mr.樂隊成員MJ都有到場，佢話黎咗Clockenflap好多年：「除左頒獎禮，呢度係見到最多圈中人嘅地方，我今晚黎睇Jarvis Cocker，好期待。」而張繼聰同老婆謝安琪仲帶埋仔女以一身全黑現身，雖然見到傳媒都有少少愕然，不過就好大方咁一家四口齊齊影相，張繼聰仲叫囡囡同傳媒揮手，之後就趕住入場睇騷啦。

萬眾期待嘅Jarvis Cocker準時晚上7點15分現身，吸引約2,000名樂迷圍觀。一身西裝打扮嘅佢，拎住塊鏡、背住台下觀眾現身，隨住節奏擺動身體，表現high爆。Jarvis以英語同觀眾打招呼：「Good evening Hong Kong， my name is Jarvis.（晚上好香港觀眾，我係Jarvis。）」然後唱出《Further Complications》，唱到副歌「Why don't you follow me？」嗰陣，台下嘅樂迷跟住大合唱，氣氛甚好。

Jarvis以英文話：「這次是我首次來香港，請對我們好一點，當然你們已經對我們很好。Jarvis接著要唱的歌，很有教育意義，我們正考慮為它出教科書，這首歌叫《Must I evolve？》。」
跟住Jarvis就用廣東話翻譯歌名：「我要進化。」全場勁high。之後佢就介紹自己曾經喺樂隊Pulp入面，仲獻唱Pulp嘅經典歌之一《His and Hers》，唱到中段，Jarvis仲坐喺台邊同觀眾作近距離。

Jarvis主動捉住歌迷隻手，問佢哋有咩令你恐懼。有個樂迷話係工作，Jarvis即好鬼馬咁叫佢要搵份自己真係鍾意做嘅工。之後有歌迷好大聲咁話自己最驚「China Government」，Jarvis聽到即望一望後面嘅band再幽默話：「如果我認同你，有可能返唔到屋企吧！（笑聲），但我想講言論自由真的很重要，而我也尊重你表達自己意見嘅自由。」

Jarvis有咁嘅反應都唔係空穴來風，最近幾星期，先後計有香港外國記者會（FCC）副主席、《金融時報》亞洲新聞編輯馬凱（Victor Mallet）不獲特區政府續發工作簽證，再以遊客身份來港時，被拒絕入境香港；另外又有中國異見作家馬建主講的「香港國際文學節」講座租場風波，由拒絕租場獲大館轉軚提供場地。





https://hk.entertainment.appledaily.com/enews/realtime/article/20181110/58898237