發表文章發起投票回覆
「返工唔一定要癲」 - 宋漢生



Basecamp團隊由一開始已經係與眾不同嘅startup。佢哋甚至唔會認同你叫佢哋做startup,事關佢哋叫自己做一間軟件公司(a software company)。叫自己做乜嘢,好似好小事,但其實我估,佢哋係特登令自己唔好因為覺得自己係startup,而對startup主流嘅理念全盤接收。

如果Uber係主流Get big fast at all cost嘅表表者,Basecamp就係另一邊嘅極端。團隊控制喺50人左右,產品就係叫Basecamp,係網上project management嘅工具,20年來年年賺錢,唔使割肉靠VC輸血,而且越賺越多,冇對外公佈實際數字,但年盈利肯定以億計。公司唔打卡,可遙距,畀頂尖人工,非常唔鼓勵加班。老闆賺錢,員工開心健康,顧客(我公司係其中一個)滿意。

我相信做軟件公司有好多條唔同嘅路都行得通,Basecamp提倡嘅,只係其中一條。問題係,行業光譜好窄,窄到好似得一條路咁,唔同路適合唔同人,我就唔信大家嘅情況相似到咁多人都應該同一條路,唯一解釋,係一條路掩蓋晒其他可能,大家根本冇認真揀,同埋唔知有乜可以揀。以前我都係咁。身邊朋友,好似只有高健時不時會講吓拉闊光譜,但係我以前一路唔係好明。

Basecamp出過幾本書講自己嘅理念。上一本書叫《Remote》,講佢哋分佈喺地球五大洲嘅團隊點樣遙距合作。今次新書,書名原本係《Calm Company》,臨出版前改為《It Doesn't Have to Be Crazy at Work》,係好嘅改動,因為返工唔想癲,第一件事,係調整心態。面對返工癲,有三個心態:一,冇辦法,係咁㗎啦。二,癲先勁,癲先會成功,最驚唔夠癲。三,要盡辦法唔好咁癲。

Bill Gates都係熱血CEO?
行業常見心態,係擁抱癲。經典例子如都市神話當年Bill Gates點樣連續寫code十二個鐘,然後喺枱底瞓完再寫等等,或邊個邊個CEO朝早第一個泊車然後夜晚最後熄燈。代表呢種精神嘅有兩年前創業名人Ben Horowitz寫嘅書叫《The Hard Thing about Hard Things》,金句係「As a startup CEO, I slept like a baby. I woke up every 2 hours and cried.」係,呢本書我兩年前有介紹過,而我當時心態正正係,癲先成功嘛,你睇佢幾癲!

點解會好容易跟咗呢種諗法?第一,講到明主流,就係如果自己唔係好有諗法,就不如借用其他人嘅諗法。其實,創業已經好唔主流,喺非主流裏面想主流一啲,係可以理解。第二,創業嘅人,通常係慣性鞭策自己同他人嘅人,本身已經有喪做嘅傾向。第三,如果未有自己諗法,好多時會揀寧願做多好過做少,而crazy at work確實會令人覺得好似做多啲,忙啲先勤力嘛。大佬本身創業已經唔慌得到身邊人支持,梗係有咁多力出咁多,先對得住自己嘅勇猛,先夠熱血!

Basecamp本書就分享佢哋咁多年嚟,係點樣營運一間冷靜公司,下次講講裏面嘅內容。

撰文:宋漢生

source : https://hk.lifestyle.appledaily.com/lifestyle/tech/daily/article/20181108/20540739
+++++++++++++++++++++++++++++++++++++++++++++++++++++++++++++++++
其實各施各法
Good0Bad0
2018/11/08, 1:40:49 下午
引用快速引用
本貼文共有 1 個回覆
一鍵留名
#null2018/11/08, 3:27:02 下午
引用快速引用
發表文章發起投票回覆
請先登入以發表回覆