發表文章發起投票回覆
Sor9y梳膠公仔眾籌成功 設計師:收工道歉牌有共鳴



https://video.appledaily.com.hk/mcp/encode/2018/11/02/3724170/20181103_sub264newAD_clean_w.mp4


梁嗣仁(Albert),3X歲 平面設計師,四年前脫離打工行列,推出個人品牌「DDED」

香港人怨氣重,很容易嬲嬲,可能需要「道歉神器」,但點解要舉中指?「親切啲誠懇啲嘛,搞吓笑氣氛輕鬆啲,道歉事半功倍。」你試過?「未,未夠膽試。」可行?「未必,希望買咗嘅可以試吓,其實我最想同買咗嘅人講對唔住。」梁嗣仁(Albert)說。

作為打工仔的你,日頭對住上司對住客,講得最多可能是:「唔好意思sorry。」心裏可能多一個助語詞。幸運一點貴為男朋友的,放工對住女王,可能又係繼續要講:「對唔住唔好嬲啦。」心裏可能多不只一個助語詞。

Albert是平面設計師,這個「梳膠公仔」是其個人品牌DDED的最新作品,「梳」係sorry個「梳」,「膠」應該係物料或者粗口諧音。至於公仔造型,就是香港常見的「工人道歉圖」,維修路面、掘地、修理爆水管,總之就是任何阻住你的工程都會見到。Albert:「其實自細已經想搞搞佢,讀書嗰陣『我的志願』都係寫呢個。」因為這工人道歉得很誠懇?「其實我一直冇接受佢道歉,冇原諒過佢,不過見呢排冇乜job,就決定試吓設計。」冇乜job係乜意思?「有時間,冇錢。」

博同情無效 加推道歉牌吸引打工仔
在香港當獨立創作人不易,眾籌雖然最多只是蝕「概念」,但也不是話籌就籌。

Albert希望集資10萬港元製作這「道歉神器.梳膠公仔」,但頭幾日反應冷淡。「之前試過出產品蝕好甘,眾籌穩陣啲,夠數先出,起碼唔使自己出咗錢先,不過壞處就係個人好囉囉攣,頭幾日反應好差,不斷諗辦法不斷出post希望成功。」有甚麼辦法?「都係啲嗱喳招,扮可憐博吓同情,話好慘呀,好失敗呀咁。」成功嗎?「冇乜反應。」失敗原因應該是香港人沒同情心,也可能是DDED未夠可憐未夠慘,更大可能是大家都看穿了他的嗱喳招,「所以都係要靠實際嘢。」

輾轉反側幾天,扮盡可憐狂出post也沒轉機,失敗在望,但就在這時,救世主出現了。「要讚頌呢個人,D、A、V、I、D,David,我朋友嚟。」當打風時我們不是最擔心爆玻璃而是擔心何時落波要返工,當風暴過後明知山有虎都偏要逼港鐵趕到公司時,就知道對香港打工仔來說,返工放飯收工射波是共同語言,「做唔晒」、「射緊波」、「Back after lunch」、「工已收」這些字句最實用。轉捩點於眾籌幾日後出現,「我朋友David提議,一個公仔唔夠共鳴,不如加多幾個道歉牌,等大家『梳』之餘,仲可以講吓點解要『梳』。」於是,幾個道歉牌製作完成,放上網即有共鳴,「之後好快就達標喇,所以,如果下次再出產品,真係要諗多啲,要有啲玩嘢又有啲實用就最好。」但實用在哪裏?「希望同事見到個公仔咁得意咁親切,搵唔到你都冇咁嬲,仲可能會考慮幫你做埋啲嘢。」親切?「你諗吓,你講得最多粗口嘅係乜時候?就係同啲friend嘅人講嘢先會夾雜粗口嘛。」


道歉神器一套,包梳膠公仔一個,四塊道歉牌,$199。


Albert說道歉分為不同階段,分別係「梳」、「梳囉」、「梳呀喂」和「梳梳梳梳梳梳」,並可配合不同動作。


「梳膠公仔」的使用方法,不過其實Albert自己未用過。


這幾張道歉牌令這次眾籌起死回生。


雖然不是打工仔,但也要投入打工仔角度,創作才能引人共鳴。

「窮到賣底褲」 懷念打工時有同事吹水
Albert之前曾經做過平面設計和廣告公司,四年前決定脫離打工行列,創立DDED。「嗰陣諗住俾自己試一年,點知試試吓就四年。」時常在網上呻窮扮可憐,早前有出過產品標榜「窮到賣底褲」,真的如此坎坷?「你唔好見我肥肥白白,我肥係因為坐得多咋。」講真話吧?「收入來源主要係有啲設計嘅外快賺吓錢,咁我又唔大使,只係打吓機睇吓漫畫。但暫時真係唔可以靠DDED呢個品牌為生,呢個專頁嘅創作同產品真係興趣行先。」眾籌達標即是有錢賺?「有,夠我維持一段短時間有飽飯食。」又扮可憐。

懷念打工日子嗎?Albert:「收入穩定啦,不過最懷念係班同事,而家成日一個人,做嘢一個人,食飯又一個人,以前有班同事吹吓水,放工又可以飲吓嘢,好玩啲。」如沒特別事,他每日上午十一至十二時起身,「諗吓有乜做,之後就落去食個晏,上嚟又諗吓有乜做,做吓嘢,夜晚就打吓機睇吓戲咁,真係分唔到星期一至五同星期六日,打唔打風返唔返工又唔關我事,我又冇乜朋友……」女朋友呢?「咁有。」堅持繼續扮可憐。

「冇打工但要同打工仔同一陣線、有共鳴,所以我成日要回想自己打工嗰陣會點會點。」有平面設計,有製作動畫,亦有推出產品,下一步?「都可能會再出產品,但真係未諗,同埋唔可以諗太多,我成日都提醒自己唔好諗住用DDED搵錢,為興趣先會做得好啲,咁反而先會有人鍾意。」經營專頁四年,五萬幾fans話少唔少,「但我真係唔識marketing,你見我扮極可憐都冇人理就知。」沒有marketing也沒有好計劃,可能才是創作人出路?


工作室有個扭蛋機,寫明「窮到賣底褲」。


之前出過的「狼淫殺」Card Game,還和安全套品牌合作。


Albert的工作室還有大量漫畫、玩具、影碟。

facebook : DDED

採訪:陳孝義
攝影:黎雋宇

source : https://hk.lifestyle.appledaily.com/lifestyle/special/daily/article/20181103/20536967
+++++++++++++++++++++++++++++++++++++++++++++++++++++++++++++++++
又眾籌
Good2Bad0
2018/11/03, 11:56:44 中午
引用快速引用
本貼文共有 6 個回覆
一鍵留名
#null2018/11/03, 12:07:57 中午
引用快速引用
重點係佢配埋人哋堆水馬同欄桿
一日多咗20k
#null2018/11/03, 12:57:58 下午
引用快速引用
都幾呃錢
#null2018/11/03, 1:02:13 下午
引用快速引用
都幾呃錢


創意嘛
#null2018/11/03, 1:41:33 下午
引用快速引用
重點係佢配埋人哋堆水馬同欄桿
一日多咗20k

咁得個公仔又真係呃錢
#null2018/11/03, 2:36:37 下午
引用快速引用
都幾呃錢


創意嘛

Eric So嗰啲figure就滿創意又形格,呢個sor9y工人…
#null2018/11/03, 2:57:16 下午
引用快速引用
發表文章發起投票回覆
請先登入以發表回覆