https://hk.news.appledaily.com/local/daily/article/20181016/20523327

2018年10月16日

爆相爆片：
思域甩尾越線撼貨車　
司機傷　弟命危


私家車沿大埔道落斜出九龍，至郝德傑道失控越線，遭貨車攔腰直撞。讀者提供圖片


長沙灣大埔道近郝德傑道發生嚴重車禍，噚日朝早7點左右，48歲姓郭嘅男司機，揸住架本田思域Type-R白色私家車，載埋44歲嘅細佬，沿大埔道落斜出九龍。

讀者彭先生揸車跟住後面，佢車cam影到私家車途中懷疑「甩尾」，司機扭右軚救車嗰陣失控，越過對面行車線，同迎面嚟嘅貨車炒埋一碟，私家車撞到變晒形。兩兄弟被困由消防員救出送院，細佬送院時昏迷，情況危殆。


私家車嚴重損毀。唐家輝攝


事發前連超兩車

喺車cam片段睇到，私家車沿住大埔道行快線，車速都幾快，5秒連過兩部車，彭先生話嗰段路行50。

點知去到近郝德傑道轉左彎之後，彭先生就見到私家車失控過咗對面線，對面線咁啱有架貨車嚟到，貨車直撞私家車左邊車頭乘客位，私家車左邊車頭變晒形，大銀幕爆裂，安全氣袋彈出，兩兄弟困住喺私家車入面。

消防員趕到將兩兄弟救出，阿哥心口痛，坐司機位隔籬嘅細佬昏迷，頭同手受傷，佢哋由救護車送去醫院救治，哥哥情況穩定。貨車車頭都撞凹咗，司機就冇事，喺現場協助警察調查，路面留低一條20米長胎痕，警方了解緊車禍原因。


司機受傷情況穩定 。


根據警方最新公佈嘅警察總區交通意外統計數字，即係包括港島、東九龍、西九龍、新界南、新界北，至9月為止共有11,567宗交通意外，傷亡人數有14,184人，當中嚴重受傷嘅有1,129人，有108人冇咗條命，死亡人數係上年全年交通意外死亡人數嘅總和。幾時都話馬路如虎口，無論揸車定過馬路，安全最緊要。


爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568


參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。


上一則
上一則
迪士尼　谷底創出米奇

下一則
下一則
爆相爆片： 醉婦瞓路軌　輕鐵及時煞停