「耗資1、2千億來徵收新界幾千公頃土地無難度，落馬洲河套區對出已達2千公頃，但依家係保育區，一河之隔，100米外係深圳，石屎森林，難道呢啲土地做深圳後花園？規劃可以更改嗎？」侯志強說。

侯志強認為，施政報告提出在大嶼山東部海域填海1,700公頃造地是長遠計劃，「不過真係太長遠，起碼要花廿年，我都唔知有無咁長命睇到。香港人好現實，你問下香港市民，係咪鍾意等廿年後，到時唔知道究竟坐水翼船、飛行車，架空橋，定係鍾意乘坐火車到達。你依家坐火車到羅湖、落馬洲已係一個新城市，你去大灣區、深圳，步行片刻即到，仲要坐飛翼船嗎？」

他質疑，要動用多少勞動力人口才能應付龐大工程，「你留意下三行，釘板、扎鐵　落石屎等等，日薪兩千幾都請唔到工人，如不開放引入勞工政策，政府舉步維艱。」

「大家埋怨房屋供應不足，如果迫切性，我覺得向陸地發展較易處理，效率也較快，填海要廿年計劃，經歷幾屆特首，都唔知道由邊個去領功。」

侯志強調，新界人從不反對政府發展土地，新界有大量土地，「如果急需土地，新界大把，例如可發展新界北或東北地方。保育無問題，可考慮低密度住宅，例如以前七層的徙置區，亦可容納多人口居住，無須興建四十層樓高，要善用土地。」

對於林鄭表示「如果影響郊野公園自己都好唔捨得」有何看法，侯志強直言郊野公園有不少是荒山野嶺，沒有人修剪雜草，蚊蟲滿佈，蛇蟲鼠蟻，野豬為患，「我奉勸佢小心行郊野公園，俾野猪咬屁股就大鑊！」

「除咗大帽山、麥理浩徑，其他都無咩人行山，除非有人在山上失足跌死，飛行服務隊先會到達，否則只是雜草叢生。」

對於市民抱怨無法置業，他見證不少實況，「當樓價下跌，無人敢買樓，連討論都唔敢；但樓價步步向上，人人就爭住買。」市民唯有自求多福。

https://nextplus.nextmedia.com/news/latest/20181015/631016