上次提到，初創喺「燒錢谷增長」同「追求有盈利」之間嘅選擇，咁啱科網公司Buffer上星期宣佈，已經從A輪VC（Venture Capital）手上回購全部股票。Buffer創辦團隊，幾年前曾旅居香港，唔少中小企畀錢用佢哋嘅產品操作自己公司社交網站。文末會講講此回購同今日題目嘅關係。

上次亦講過，如果產品性質，係多邊網絡效應平台嘅aggregator，就冇乜得揀，焗住燒，唔燒好難生存。今次講講，aggregator以外嘅公司，面對呢個選擇嘅考慮。

選擇一，燒錢谷增長，為咗高速增長不惜一切，包括犧牲盈利。至於想增長乜嘢，大概就係同市場佔有率有關嘅嘢，例如用戶數、定單數等等，總之就唔係盈利。好處係，越快變大，越感覺好似早着先機霸位，反正有投資者肯畀錢就得，唔好理啲錢到底係投資者畀定係用戶畀，總之一蚊就係一蚊。

呢種食大隻丸谷肌嘅做法，可能產生拔苗助長嘅副作用，例如集資之後指定動作係急速請人，急速請人好容易溝淡公司文化，變得雜亂不一，同時管理層嘅能力大受考驗，容易變成同事間嘅工作互相抵銷。結果通常係指標係升咗，但越積越多管理債，遲早還。但又唔代表呢條路唔通，只要你企正個風口，做到個份額，而且又唔等好耐就有人出好價收購，咁燒嘅錢就一鋪翻身，管理債都唔關你事，賣咗嘅問題就係下手嘅問題，mission accomplished，打爆機。

有人問，一間從未賺過錢嘅公司，點解會有人畀好價買？因為好多時，買家要嘅唔係買盈利，而係買策略價值。例如，facebook鐵定唔容許有其他社交網站超越自己，所以邊個爆紅就出價買邊個，Instagram，WhatsApp，snap（唔肯賣），價錢唔係問題，未賺到錢更加唔係問題。Google自己做唔掂視頻，就天價買勁蝕嘅YouTube，微軟想洗底討好年輕一代programmer，高價收購蝕錢嘅Github。

燒錢谷增長嘅唔好處，係以上嘅大團圓結局，非常取決於外在因素，而一日未到大團圓一日，時間係你嘅敵人，時間越長，就燒咗越多，每12至18個月就要集資入油加碼，一旦需要入油時有乜依郁，啲指標增長唔生性，個市唔就，或者投資者投降，就隨時執得。如果一路無人出價，或者出手底，中間嘅等待，可以係幾難捱嘅時光。

忌搖擺不定　Buffer揀儲錢做回購
選擇二，係喺賺錢嘅前提底下增長。缺點係會冇咗外來資金去追增長，好處係，當你有紀律賺錢，就比較容易限制自己嘅盲目虛妄、過份樂觀、假大空、自我膨脹、好大喜功。你賺錢，時間就係你嘅朋友，因為每過一個月你就賺多一個月錢，投資界吹寒風？冇影響。冇人想買你？冇所謂，賺錢嘅嘢你都唔心急想賣。邊個邊個投資者指指點點叫你做唔想做嘅事？冇可能發生，因為客人先係金主。想對員工好啲？你公司自力更生就冇問題，唔使得到驚死蝕底嘅投資者批准。基本上，就算係一蚊嘅盈利，都已經係令你有實力獨立嘅所謂FU money。退一萬步講，就算有一日真係要集資，條件都會靚好多。

文首提及嘅Buffer，回購股份只係其中一步，再之前，三個高層有兩個走咗，跟據夫子自道，原來呢幾年公司不停在兩個選擇之間鐘擺，最後決定揀實選擇二，先係分道揚鑣，然後儲錢做回購。其實兩個選擇都可以行得遠，但最忌係搖擺不定，或人格分裂東一忽西一忽，因為賺錢要紀律，紀律同公司文化掛鈎，而公司文化唔係話扭就扭，往往係要換走一批人先轉得到，呢個係另一個題目了。

撰文︰宋漢生

source : https://hk.lifestyle.appledaily.com/lifestyle/tech/daily/article/20180906/20492700
+++++++++++++++++++++++++++++++++++++++++++++++++++++++++++++++++
其實現在燒錢好克制了