上次提到，公司前排管理不善，燒錢越燒越快，就快執得，用咗洪荒之力先扭得番軚。有人問，咁點解當初又容許燒咁耐先改正？又有人問，乜原來startup係要賺錢嘅咩？

兩條問題，其實係同一條問題。正常生意，蝕錢應該係一個警號，問題係，喺呢行，個風氣係燒錢，唔係賺。所以正常人嘅警號，對呢行嘅公司來講，唔算警號，甚至有人會覺得，賺錢先係警號，係咪代表太過保守。

個風氣係，不單止未賺到錢，甚至連點樣賺錢，都唔需要諗。所以時不時有行外嘅人，想投資startup，同創辦人傾完之後，會好疑惑，點解班友唔使諗點賺錢？點解我做咁多年廠要煩點賺錢，佢哋唔使？Startup係咪另一個世界？我唔識嘢定係佢唔識嘢？至少有一點，連支持燒錢嘅人都會同意：最終目標都係想攞番超過燒咗嘅錢，無論係後來每月賺番又好，或者一炮過賣咗佢又好。所以應唔應該賺錢，係一個早唔早期嘅問題，唔係終極嘅問題。

好難責難有startup唔早早就諗賺錢或賺到錢，事關創辦人睇到嘅數據係：WhatsApp同Instagram都唔賺，但以超過十億美金俾facebook收購；YouTube就高價俾google收購，而前排Microsoft就大手筆買咗仲燒緊錢嘅GitHub。最值錢嘅未上市公司Uber好似有排都未賺到已經燒咗嘅。就算係上市公司，Snap到?家都未賺錢，Netflix同Tesla都係，而Twitter就用咗十年先開始有得賺。咁多嘅成功例子，說明賺錢唔係必須，燒錢都有或先有投資者有興趣。

犧牲盈利搞大增長
關於燒錢定賺錢嘅選擇，我覺得，第一個關鍵，係睇吓自己盤生意，係咪做aggregator，係咪變大到一個點之後對用戶嘅價值會急升，而因此向某方嘅議價能力急升，例如有龐大網絡效應嘅兩方或多方嘅市場。好似Airbnb有兩方：租屋的人和放租的人。Facebook有三方：讀者用戶、內容供應者、廣告商。而兩者都有明顯網絡效應。喺呢個語境底下，不惜犧牲盈利去搞大增長，可以理解，甚至係冇得揀，一定要咁做，先可以成功。

有人會問，乜唔係大部份startup都係做aggregator模式咩？其實唔係，只不過，aggregator嘅公司最多新聞，最多人留意，所以有此錯覺。亦因此，好多明明唔係做aggregator嘅startup，仲以為自己嘅選擇應該同嗰啲公司一樣，梗係要燒大佢。

除咗風氣、誤會，仲有一個因素，雖然集資難，同投資者周旋及被拒絕係慘，冇創辦人鍾意做，但係要持續賺錢，本身都唔係容易嘅事情，如果有任何藉口可以拖延，拖得就拖係好大嘅誘惑。你可能會話，要控制成本，咪砍嘢囉，但係信我，積落嘅嘢，唔係想像中咁容易undo，拎起容易放低難，賺錢嘅紀律，唔係你話要有就忽然會有。下次講吓，賺錢對startup嘅好處。

撰文︰宋漢生

source : https://hk.lifestyle.appledaily.com/lifestyle/tech/daily/article/20180830/20487460
+++++++++++++++++++++++++++++++++++++++++++++++++++++++++++++++++
只等 DOT COM 潮歷史重複