HKGalden娛樂臺
發表文章發起投票
【姊弟戀】男神彭于晏戀上大13歲許晴碎粉絲心? 盤點圈中姊弟戀
呢個年代,咩都有可能發生!唔係剩係男人先有特權鍾意嫩口少女,女人一樣可以揀小鮮肉!不過,邊個話女大過男,就一定冇好結果?即睇以下娛圈姊弟戀!

許晴 彭于晏 相差13年

近日有傳「世界級男神」彭于晏同49歲嘅內地女演員許晴拍拖,遍佈世界各地嘅「彭太太」們心都碎晒,話晒許晴都大過男神13年㗎!兩人拍攝電影《邪不壓正》時認識,雖然許晴已經年屆近50,不過佢皮膚白裡透紅,保養得好好,連身材都fit到漏,彭于晏真識玩啊!

鄧麗欣 邱勝翊 相差5年

同方力申分手三年,34歲鄧麗欣(Stephy)終於搵到佢嘅真命天子啦!Stephy嘅真愛就係細佢5年嘅前台灣男團棒棒堂成員邱勝翊(王子)。雖然兩個人好似大纜都扯唔埋咁,不過緣份嘅嘢就真係好奇妙,Stephy自上月Sweet爆認愛後,愛得愈黎愈高調,除咗不時孖住男友一齊外遊,佢Instagram仲unfollow哂全世界,只得歌迷會及王子有得留低!蜜運中嘅女人,真係唔同啲嘅。

楊怡 羅仲謙 相差5年

就快39歲嘅楊怡,同羅仲謙(謙謙)拍攝無綫劇《On Call 36小時》撻著。當年有傳羅仲謙同前女友傳穎拍拖時,曾兩度毆打對方,加埋年紀上嘅差異,令楊怡同謙謙嘅戀情不被看好。雖然謙謙細過楊怡5年,不過佢真係好識氹老婆。除咗喺Instagram度只係follow咗楊怡一個之外,平時老婆工作至凌晨先收工,佢都一定會親自接送!謙謙仲連放假嘅時間都畀哂老婆,唔止帶住佢環遊世界,連岳母都一齊去旅行!果然孝順嘅男人,都係錫老婆㗎。

楊千嬅 丁子高 相差5年

圈中模範夫婦楊千嬅同丁子高自2009年喺美國拉斯維加斯秘密結婚後,自今仍然熱戀中,兩人不時放閃真係羨煞旁人。丁子高曾高呼娶到千嬅,係佢一生人最大嘅幸福!平時丁太睇落cool cool哋,原來丁太喺屋企都只係一個普通小女人,為咗煮丁子高最鍾意食嘅咖喱雞,仲出去上堂學廚。而丁子高對千嬅嘅愛,更加唔使多講啦!有邊個男人肯無時無刻為你製造驚喜啊?丁子高曾經喺千嬅生日嘅時候,為佢安排咗一場屬於佢嘅煙花,千嬅都畀佢嚇親,公主變蕃薯。

http://nextplus.nextmedia.com/news/latest/20180821/616403
Good1Bad1
2018/08/22, 6:25:13 晚上
本貼文共有 0 個回覆
此貼文已鎖,將不接受回覆
發表文章發起投票