https://hk.entertainment.appledaily.com/entertainment/daily/article/20180819/20479624

2018年08月19日

【娛樂人物】《造星》姜濤
肥仔大翻身


■《全民造星》彈出的參賽者姜濤被讚靚仔似彭于晏，他於小學、中學時期是一名200磅肥仔。


ViuTV《全民造星》選男神成為話題節目，除了有不少「諧星」，亦開始有高質選手出現，樣子似足男神彭于晏的19歲參賽者姜濤，憑着靚仔靚聲成為頂頭大熱，成功令星級導師火火及劉美君大派心心。其實，靚仔非一日煉成，他小學、中學時期曾是200磅的肥仔，沒自信再加上心儀女生也睇不上他，才化悲憤為動力減肥。

採訪：黃曉妍
攝影：陳慧安



現年19歲的姜濤在ViuTV《全民造星》節目中，演繹《我多喜歡你，你會知道》打入40強，小鮮肉的年紀、靚仔外形及靚聲成功俘虜咗一班少女心，更被指似台灣男神彭于晏，確是「造星」中的潛力股。



狂隊漢堡

日前，姜濤在柴灣接受《蘋果》專訪，分享了他由一個200磅小肥豬變靚仔的勵志故事。他表示在小學至中學時期曾是肥仔一名：「原來係因為食漢堡食得太多，自己讀小學三年級開始，由於經常食老麥，令體重直線上升，食咗兩個餐，過半個鐘又肚餓，臨瞓前又食兩個漢堡包，當時被人話肥仔係因為得意，唔會覺得冇自信，後來小學升中學，我肥到要見醫生，因為差唔多200磅，屋企人勸咗我年幾，我先正視呢個問題，而且當時暗戀咗個女仔。」

問到是否因為被拒愛才的起心肝減肥，他表示：「嗰時以為自己靚靚仔仔，但睇番畢業相，發覺自己同人哋唔一樣，加上個女仔同第二個男仔一齊，對我打擊好大，因為嗰個男仔係靚仔，於是我就減肥，不過我唔識減，一係唔食嘢，或者食水果，食完係咁跑步，運動三、四個鐘，搞到虛脫，係唔健康嘅瘦，後來讀運動教練課程，我先知道點樣減，目前為止體重係152磅左右。」



■青春期的姜濤是大肥仔一名。


■在節目中，王心美見到「小鮮肉」姜濤，即心心眼大讚。



肥到爆褲

失去自信，除咗心儀對象已名花有主，姜濤還要面對閒言閒語：「當時唔夠膽識人，搞到性格有啲孤僻，又唔識同人哋講嘢。」問到他遇過甚麼不快經歷，他表示：「記得讀中一，我因為太肥而爆呔，我去校務處拎一條新褲，但係冇我個size，我咪夾硬扣埋條褲，點知返到班房一坐低，個釦又爆開咗，自己都覺得唔好睇，開始冇自信，啲人見我就話：『讀書又渣，樣又冇，又肥又蠢。』所以冇乜朋友，後來打籃球先識到一班有共同興趣嘅朋友。」

現在已蛻變成靚仔一名，但他的感情狀況仍是單身，未有心儀對象：「我冇行動，如果我要做呢行，就要專心做好，如果拍拖會分散注意力；反而有次搭巴士，我見番中學時暗戀嗰個女仔，佢?家肥咗，我見到佢都呆到唔記得落車。」


上一則
上一則
姚子羚恨同胞妹齊出騷

下一則
下一則
內地騷．陷阱？