https://hk.news.appledaily.com/local/daily/article/20180819/20479684

2018年08月19日

Freestyle人物：大學生組Hip Hop團　
站在道德低地　
爆粗狂Ｘ獨裁


■米奇老味神奇屋於觀塘工廈設有錄音工作室，他們一直在認真與不認真之間，高舉反叛旗幟。


正當香港人忌諱於談論一黨專政，由「六大富豪」馬太福音、蜜蜂翁、奶油包、漢和、劈友方、健康華組成的「富林黨」卻橫空出世，極盡「劈友、媾女、販毒」之能事。短短三年，他們已在香港吸納不少黨員，去年更召開《全國代表新碟發佈大會》，宣揚《黑社會主義好》，並發出公告表示，未能參加大會的同志將受到坦克車的制裁──
認真你就輸了。

六大富豪其實是香港Hip Hop組合「米奇老味神奇屋」六個九七年出生的香港大學生。他們的歌曲題材踩界，歌詞句句十八禁。有人指他們是香港樂壇的最後希望，亦有人批評他們「教壞細路」。他們則一於懶理旁人指指點點，繼續以戲謔卻最真摯的歌詞，rap出這個荒誕世界。

撰文：陳芷昕　攝影︰何柏佳


訪問當晚，記者來到米奇老味神奇屋位於觀塘工廈的藏身之處。錄音工作室雖半掩了門，仍隱約傳出強勁的Hip Hop音樂節拍。六大富豪尚未人齊，奶油包、蜜蜂翁和馬太福音3人於是開始整理置於客廳的十多個紙箱，準備點算剛到貨的演唱會T恤商品。奶油包一邊手持電話攝錄同伴利落?開紙箱的畫面，一邊為被撕裂的紙箱「配音」，痛快忘情地呻吟，然後三人一同放聲大笑。

「啲人肯畀三嚿幾水睇我哋開騷，先係人生輸家。」

歌如其人，米奇老味神奇屋的作品一向予人無厘頭兼百無禁忌之感。2015年，在第二張Mixtape《龍城大藥房》中，六人自封「六大富豪」，厲聲歌頌狂妄放縱的生活態度：「一生一世，嫖賭飲吹／X完你阿媽，就X埋你個女」、「日日劈完友就開支香檳」、「讀完爛鬼碩士，返過9至6／一年賺嘅錢唔夠我一日販毒」，像90年代美國西岸一眾以黑幫形象示人的gangsta rapper般好勇鬥狠。但偏偏封面主角蜜蜂翁佩戴金牙、金錶、金鏈之餘，手拿一隻金豬，反博得諸君一笑。

六人到2017年，決定「打大佬」挑戰香港底線──政治。他們推出第五張Mixtape《黑社會主義好》，再次由蜜蜂翁擔任封面主角。今次他穿上黑衣，戴上皇冠，露出慈祥的笑容向人民揮手，背後升起了紅太陽。再看Mixtape內的十二首歌曲名稱：《國歌》、《黑社會主義好》、《豪宅東》、《大藥進》、《坦克車》、《改革開片》等，戲謔的對象顯而易見。

六大富豪不再只是「黑幫」，而是全球最大、一黨專政的「富林黨」，實行極權統治，歌詞中亦盡見敏感題材：「解放軍嘅工作就係將佢哋解放／天安門母親佢哋兒子已經無肉身」、「差佬唔X理胡椒噴霧周圍啡／黃之鋒一擘大口就俾催淚彈顏射」（《坦克車》）；「富林黨最X憎一人一票／寶馬坦克車碌到你們瀨晒尿」、「貪污一定唔會停我係習近平」、「佢哋話中國共產主義太殘忍／我哋話屠殺民主正過食白粉」（《豪宅東》）。

推出這隻「國民教育大碟」後，他們更在九展召開《全國代表新碟發佈大會》，並以簡體字發出公告表示：「此活艻为强制性，未能煼加的同志們也都蕋受到坦克?的制裁，敬请自重。」蜜蜂翁更在大會上化身成翁主席，穿起制服，以小號吹奏徘徊於走音邊緣的《義勇軍進行曲》，引來全場歌迷叫好。


今日，廿三條和國歌法蠢蠢欲動，六大富豪未驚過，聳一聳肩說：「我哋想叫人唔好做『蜥蜴基佬』嘅奴隸，就係咁簡單。」記者聽得發呆，蜥蜴基佬是誰？眾人再次哄笑成一團之後，奶油包一本正經地解畫：「呢個世界所有大公司同政府都俾蜥蜴人控制，最高層、最有權力嘅人都係蜥蜴人，希拉莉、奧巴馬、Mark Zuckerberg、李嘉誠都係。呢個世界太多蜥蜴人，搞到好躁，所以寫啲歌嚟抵抗吓佢哋。」

六人絕非亂噏當秘笈，在本月新推出的Mixtape《富林太空站》中，又化身為「旺角最惡」的黑幫，告訴世人「地球是平」的證據：「你哋咁X蠢根本唔識敵人／因為所有地產佬都係蜥蜴人／佢哋用呢個大話嚟搵藉口抬高地價／話香港冇晒平地畀啲平民霸／之後加你租加到你哋冇晒錢」（《地平》）。

三年之間，米奇老味神奇屋的歌詞一再踩界，甚至「過晒界」，大膽又富有玩味的風格讓一眾網民大呼「過癮」，封他們為「香港樂壇的最後希望」；但同時亦被不少人批評低能、弱智和道德淪喪。

對於指指點點，他們一概懶理，反而大力嘲諷這些「衞道之士」。「我最憎嗰啲留言──『香港?家竟然係聽啲咁嘅嘢』、『香港樂壇竟然變成咁』。

我嘅回應係：收皮啦。」健康華一邊說，其他人紛紛起哄表示支持。他們甚至從「當局者」超脫成「旁觀者」，並樂在其中。「我哋同大部分香港人嘅分別係，我哋一開頭就擺自己喺道德低地，你哋鬧我哋啲嘢我哋係知晒。睇住你哋喺度審我哋，然後我哋笑番你哋審我哋。其實你同我哋都差唔多柒，但我哋肯認。」

六人認為米奇老味神奇屋的音樂，其實是很多香港人埋藏心中的想法，只是大部分人都被社會壓抑已久，以致「唔夠薑」說出來。「蜥蜴基佬發明啲wifi電波飛嚟飛去，洗晒大家腦，令佢哋唔覺得自己有諗過呢啲嘢。人長期被虐待，慢慢就會慣，所以我哋要搵新嘢刺激佢哋。」

嘲諷反對者之餘，健康華又揶揄支持他們的歌迷：「啲人鍾意我哋，因為我哋冇包袱。其實我哋可以喺香港紅到呢個點，已經值得討論。啲人肯畀三嚿幾水嚟睇我哋開騷，你哋先係人生輸家。」其實六人從一而終，只是純粹「做自己」而已。

「讀U最好嘅感覺就係喺社會上高咗個階級。」

或許因為「太做自己」，識於「微時」的六人自小學起已被標籤為反叛分子。他們就讀港島名校聖保羅，自稱因智商太低和「完全不合作」態度，被所有老師和同學唾棄，彼此反因志同道合而建立了深厚友誼。從小喜歡聽rap的他們會在操場battle，上課時又會在抽屜內偷偷寫rap，「寫呢個社會唔明白我，我大個要做明星……」就連六人的父母也不明白他們為何如此反叛、到底在不滿甚麼。「父母一定反對仔女搞音樂，淨係想仔女讀書，做律師、做醫生，唔係嘅就係敗家仔。」理着平頭、看起來「最乖巧無害」的馬太福音說。

現在，六人都是大學生。在世人眼中，他們儼如開啟了成功之門，走上富庶的康莊大道，而非讀不成書走去搞音樂的爛仔，但他們卻對這個身份嗤之以鼻。讀政治的奶油包說：「當我哋六個都冇讀大學，我唔覺得我哋嘅音樂會有分別，但人哋會覺得有。我之前中學未畢業，啲人就當我戇X；我入咗大學之後，個個就當我叻仔。香港人就係咁蠢。」記者調侃問：「咁你哋又入U？」蜜蜂翁輕蔑說句：「讀U最好嘅感覺就係喺社會上高咗個階級。」

嬉笑怒罵背後，或許六人在作品中最想諷刺的，就是香港人。「香港人呢個身份一直好模糊，但一直冇變嘅就係獅子山精神，但呢個未必係一個褒義詞。獅子山精神就係淨係諗錢，睇嘢得一個角度，就係點先賺到最多錢。」蜜蜂翁續道：「我哋呢啲咁鍾意錢嘅人，為咗錢咩都肯做，咪俾蜥蜴人有機會去操控我哋囉。」健康華揚言他們的作品是要評論和拯救人類：「寫番我哋點睇蜥蜴人點操控我哋，要令人反抗佢哋睇到嘅嘢。」

歷史告訴我們，反叛的人在社會多難有好下場。記者好奇：到底這六個少年有何夢想？他們會走上一條不一樣的路嗎？奶油包率先搶答：「搞音樂。」其餘幾人開始爭相高叫「我想賺好多錢」、「我想去打機囉」，「我想得到父母嘅認同」，「我想得到愛，我想有女仔揸住我隻手，喺女仔某個範圍內呼吸」。Studio倏然迴盪着少年人放肆輕狂的笑聲。




「直到世界完美之前，我哋都要反叛落去。」

其實早在三年前，六個少年已在《一生一世》中寫下「我的志願」:「同你講個秘密啊，我哋點解咁有錢，都係因為我哋六大富豪個個都搵到人生真正做人嘅意義係啲咩嘢……理得你係藍絲、黃絲、定係千頌伊／人嘅命運仲簡單過ABC／逃避唔到滅亡嘅一劫／嫖賭飲醉、風花雪月全部都會了結／米奇老味絕對唔會妥協／我哋嘅任務係要屹立新嘅偉業／錯嘅唔係我錯嘅係世界／變嘅唔係我變嘅係社會／同米奇老味揭竿起義拎起士巴拿／同呢個唔合理嘅制度講sayonara。」

他們一直在認真與不認真之間，飾演着米奇老味神奇屋的六大富豪，高舉反叛旗幟，因為深信反叛就是推動社會進步的動力。「唔反叛嘅世界就唔係完美嘅世界。反叛唔係代表所有嘢都要180度反轉，咩都唔做唔要，你要為自己去諗。直到世界完美之前，我哋都要反叛落去。」


上一則
上一則
昨晚六合彩開獎結果

下一則
下一則
【飲食男女】在乎•一點心