https://video.appledaily.com.hk/mcp/encode/2018/07/28/3663625/20180729_sub484AD_mp4_clean_w.mp4


Tom(左)和媽媽(右)加撐弟弟Neo(中)打電競。

食雞《PUBG》(港譯：《絕地求生》)大熱，8月24至26日舉行的「電競音樂節」中，就會舉行「香港《絕地求生》世界邀請賽」，獎金池高達15萬美元（逾100萬港元）。早前舉行的選拔賽亦有數支食雞職業隊參加，其中包括英皇電競G-Rex戰隊。每次G-Rex上場，例必有位狂熱fans落力揮旗打氣，原來是隊員Neo（杜柏輝）的哥哥Tom，亦是樂隊Mr.的鼓手。

唔只阿哥Tom，媽媽亦同樣接受訪問撐細佬打電競。「有唔同！依家行步路都型好多，以前行路係飄嘅。」Auntie坦言唔識打機，唔知電競係乜，但金句多多的她，覺得仔大仔世界，都有問清楚會唔會係呃人，分析過就讓細佬自己決定。「佢搵到自己鍾意嘅嘢，搵到價值係好事，好似我鍾意打麻雀，打48圈都唔攰，鍾意咪試媖，又唔係學壞。」


Neo目前效力英皇電競的G-Rex戰隊。


Tom自製隊旗支持弟弟比賽。


G-Rex上季有參予台灣舉行的Metalhog職業聯賽，取得第7名。

「阿媽嘅意思應該係，人哋問細佬返咩工，佢可以抬頭咁答人：『做電競選手』」Neo打機其實受阿哥Tom影響，小學已經打《Rainbow Six》、《CS》這類槍game，讀書成續一般，中學離校後做過不同職業，近年在Tom的樂器店打工。「佢做嘢呢幾年已經實淨咗好多，幫到手，但呢半年打電競之後，多咗份自信。」Neo打機早有戰績，早年和朋友組隊打《Rainbow Six Siege》，曾經拿過亞太區冠軍和到澳洲打世界賽，也有想過全職打電競，但當年並沒有這樣的環境。近一年《PUBG》爆紅，戰友邀請他加入，其後得到英皇電競賞識簽約，組成G-Rex。Neo想先也是問阿哥意見：「得我哋兩個打埋間舖，都驚阿哥一個搞唔掂。」兩兄弟傾完，Tom就叫Neo放膽去馬：「人生冇幾多機會，係你鍾意嘅嘢而又可畀你大顯身手，之後嘅嘢之後先算喇！」

Tom雖然這樣說，但當初想不到電競，真的能讓選手在華麗舞台上大顯身手。「睇完之後會覺得，好似比我哋嗰行更加正規。」有系統式訓練，有時間表，戰術分析甚至會列印遊戲的建築物畫面，研究間屋有幾多道門、幾多道窗、要點攻入去。阿Tom越睇越有興趣，當了頭號fans，笑言睇電競識睇其實好睇過NBA，甚至弟弟去台灣打比賽都跟埋去睇「好記得3年前，舊唱片公司帶Mr.去台灣宣傳，我哋去過一個電視台，估唔到比賽喺同一個錄影廠舉行，場面真係好大，好開心細佬搵到一個咁嘅舞台。」

其他人未必好像Tom和Auntie般開明，當初好多朋友叫Auntie唔好畀個仔打機，不過見到電競相關的報導後，又大讚Neo叻仔，可見三姑六婆之言，不必要絕信。Auntie就話唔理人點睇，專重Neo決定，但最緊要盡力：「就算係阿媽，有一早洗碗都要盡力，要洗得比人乾淨，要畀心機去做，咁先有價值。」Tom就很感觸的多謝電競能夠成為職業，當年帶細佬打機總算沒有令他誤入歧途，也給了機會Neo顯所長。

不過電競之路仍然艱難，面對的競爭也甚為殘酷，G-Rex在選拔賽頭兩日都領先，但最後一日被反超前，得到第三名，無綠取得僅有兩名的世界賽資格。Tom寄語Neo：「希望佢哋好似《男兒當入樽》隊湘北。」輸咗都能繼續努力，繼續成長，好像動漫畫的主角般修練完繼續挑戰這條電競路。

記者：司徒港燊

source : https://hk.lifestyle.appledaily.com/lifestyle/tech/daily/article/20180729/20463024
+++++++++++++++++++++++++++++++++++++++++++++++++++++++++++++++++
又吹捧 )