HKGalden娛樂臺
發表文章發起投票
【日版25周年】港版《同一屋簷下》開拍 周柏豪接棒演靚仔醫生
風水輪流轉近年韓劇當道,連帶睇開大台膠劇嘅師奶、婆婆都轉投韓流市場。曾幾何時日劇亦有過類似風光,《悠長假期》、《東京愛的故事》、《愛情白皮書》、《戀愛世紀》帶來幾許青春嘅回憶。

不得不提嘅當然係有江口洋介、福山雅治同酒井法子主演嘅《同一屋簷下》,今年喺該劇播出25周年紀念,蕭定一旗下hmv數碼中國買咗香港版權,拍攝港版《同》劇。大家嘅焦點自然集中係柏木六兄弟姊妹身上,日版大哥「達也」由江口洋介飾演、跟住順序係二佬「雅也」福山雅治、三妹「小雪」酒井法子、四佬「和也」石田壹成、五妹「小梅」大路惠美,細細佬「文也」由山本耕史飾演。至於香港版,阿一屬意由旗下藝人演出,據知張智霖飾演「達也」、周柏豪演「雅也」、連詩雅演「小雪」、張建聲係「和也」、「小梅」係沈月萍、「文也」就會係蔡翰億(BabyJohn),而胡杏兒有機會演張智霖嘅未婚妻,周秀娜飾演內田有紀角色,演一名有心臟病嘅演員,同柏豪有唔少戲份。

港版故仔會同原著一樣,圍繞幾兄弟姊妹情,主要情節好似大佬、二佬同養女小雪嘅三角戀都會出現。不過由於係港版,同埋25年後再開拍嘅關係,社會亦出現好多變化,日常生活多咗手機同apps所以角色、環境都會調整。

套劇預計秋天開拍,初步拍攝22集,由之前《選戰》導演黃國輝負責,暫定下年播出。阿一方面就回應話:「《同一屋簷下》係一套好經典嘅日劇,亦係好多香港人嘅集體回憶,我哋係買咗版權會拍港版,故事情節會盡量保留,但角色同環境係加入o依家時代嘅氣息,而喺25周年、四份一世紀後再拍番亦好意義。」

《同一屋簷下》日版電視劇93年喺日本播出,平均收視達到28.2%,成為富士電視台最高收視劇集之一。故事講述柏木兄弟嘅父母死於交通意外。六兄弟姊妹分別要到親友處寄養或者被人收養。多年後大哥江口洋介從馬拉松選手退役,返到東京希望各散東西嘅弟妹可以聚首一堂。每集開場都有一隻放有牙擦嘅杯作比喻,由只有兩隻到最後放有六隻,代表一家團聚。當中加插大哥江口跟二佬福山,都分別愛上柏木家養女酒井法子飾演嘅小雪。




https://hk.entertainment.appledaily.com/enews/realtime/article/20180705/58398958
Good1Bad1
2018/07/06, 6:27:26 晚上
本貼文共有 0 個回覆
此貼文已鎖,將不接受回覆
發表文章發起投票