早前提過，科技巨獸冒起，不同對用戶或供應商嘅權力高度集中，由Spotify決定唔推邊個打老婆嘅歌手嘅歌曲，到Twitter唔畀睇到疑似搞事嘅用戶嘅留言，到facebook唔畀宣傳關於加密幣嘅post，無論巨獸樂唔樂意，出手定唔出手，都係權力運用，無得避。恐怖嘅結局，係一大堆科技公司開路，然後巨獸吞併，終點卻係政府收編收割收成。集權巨獸加埋極權政府，成為牢不可破嘅新常態。

權力嘅高度集中，對巨獸嚟講，有辣有唔辣。不過收入嘅高度集中，就肯定係巨獸所欲。今次就討論收入呢一環。順帶一提，關於互聯網aggregators，我覺得分析得最精采嘅是Ben Thompson，佢個blog叫stratechery，係少數我畀錢訂閱嘅blog，有心人最好睇番原文，應該會所獲甚豐。

巨獸有幾巨呢？以報紙業為例，廿幾年前，《蘋果日報》出現，成為高銷售報紙，其讀者市佔主要係由其他本地報紙贏番嚟，亦因此從對手手上贏埋廣告收入。呢個係一個行家成功分一大杯羹嘅例子，行行都會發生，亦都係時不時會發生。不過如果唔只贏咗一杯羹，而係將全行嘅收入盡吸，咁就比較出奇。而如果盡吸嗰一個，本身唔係報紙行，就更出奇。而如果呢間嘢唔只盡吸一個地方嘅報紙收入，而係全地球嘅報紙收入，就令人停低諗諗，乜事呀喂？
大家都知，呢個已經係現實，全地球嘅報紙公司，從《蘋果》到《New York Times》，全部都見到收入不斷減少，無一倖免。錢去咗邊？好多去咗一間公司——facebook。

fb用戶供免費內容　廣告跟人走
話說回頭，facebook係點樣盡吸報紙行業嘅廣告收入？一定唔係同之前做法一樣。如果要錢同全世界買內容，買得幾多？調番轉，先由免費內容入手，而用戶自己提供嘅內容，貓相呀，chok相呀，BB相呀，全部免費，令好多用戶習慣睇facebook消磨時間，攞住用戶時間在手，傳媒最終都要屈服，以facebook主導嘅條件，成為yet another內容供養商。

另一邊對廣告商，以前明明係由報館將廣告同內容掛鈎，但facebook就將內容同廣告拆散，從此廣告跟人走，其實廣告商從來都想廣告跟人走，以前廣告跟內容走，只係做唔到，退而求其次。樽蓋一旦打開，唔會收得番。換句話講，廣告跟人走淘汰咗廣告跟內容走，所以各方都只可以靠識做廣告跟人走嘅公司例如facebook做中間人，處理晒幾乎所有廣告嘅事務。

呢個演變，無人有遠見到第一日就諗到，而係科技發展將路徑基本鎖定之後，總有人摸到條路出嚟。以上兩邊玩法，其實同Google一樣，例如Google嘅內容，即係地球上嘅公開網頁，唔使畀錢買，靠用戶體驗（最快最準最齊）坐大之後，惡到叫Google唔好免費「挪用」自己內容嘅網站唔多，反而畀多多錢想Google排自己高啲嘅就大把。主要分別係，Google只係免費攞嚟用，無得阻住其他人用，facebook直頭免費攞埋版權，同埋攞道牆（登入）圍住，係再高一級難度，亦因此係防城河再高一截嘅屈機。

類似劇本，在其他行業亦相繼出事，包括酒店業嘅Airbnb，載人運輸業嘅Uber，零售業嘅Amazon，影視界嘅Netflix，音樂界嘅Spotify，等等等等，而全部都係喺互聯網或流動互聯網時代先發生，所謂Software is eating the world，其實是the internet is eating the world，同樣戲碼在平行互聯網同時上演。正如港人對九七嘅恐懼，遲了廿年先應驗，然後以加速嘅步伐加速，千禧年前世界對互聯網嘅憧憬，十年後成真，然後以加速嘅步伐加速。有強烈理由希望，兩條軌道嘅相交點，有咁遠，得咁遠。

撰文︰宋漢生

source : https://hk.lifestyle.appledaily.com/lifestyle/tech/daily/article/20180628/20433372
+++++++++++++++++++++++++++++++++++++++++++++++++++++++++++++++++
fb好似就來推翻老細