龍小菌罩已除，有人話好，有人話唔好……佢經理人兼「疑似男友」邵子風話好。但有fans就話唔好。理由係當日(6月15號)，龍小菌係行街街嗰陣被拍到罩已除「真相」，唔係龍小菌主動喺歌迷面前現真身。話係一個gimmick又好，想歌迷專心聽佢嘅歌唔計較個樣都好，罩，已經除咗。

之後龍小菌個經理人兼疑似男友邵子風接受本報訪問時話，龍小菌除罩後潛咗水，佢都搵唔到小菌，亦再度否認自己係小菌男友。到底係真潛水定想有well plan，唔知喇。方才龍小菌就喺個人facebook專頁，發咗個聲明俾大家，內容如下:

「傳媒、好友、歌迷們：

自出道以來，我一直幪著臉、隱藏身份，希望聽眾集中關注我的音樂，不要以貌取人。

傳媒、大眾對我的真實身份、真面目有多種揣測，但在起底過程中出現『起錯底』、『點錯相』的情況，令其他中學的中文科老師受到不必要的騷擾，本人在此致歉！

我將會在第二十四場『龍小菌街頭音樂會』回應一切傳聞，以正視聽，歡迎各界傳媒、好友、歌迷們參與，謝謝！

龍小菌」

呢個街頭音樂會將於周六晚(22號)8點鐘，喺旺角行人專用區舉行。究竟佢到時係用真身定係幪面look現身？睇番佢呢份聲明，提到「點錯相」呢個問題，唔通龍小菌話當日除咗罩嗰個唔係佢？