HKGalden動漫臺
發表文章發起投票
畀成年人睇嘅「叮噹」:《Rick and Morty》



對「高階毒L」而言,互聯網越嚟越似一個劣幣驅逐良幣嘅垃圾缸。

喺未有internet,未有social media嘅年代,流行文化口味好大程度掌握喺創作人同媒體手上。即使要考慮票房、收視,即使要睇往績同市場調查,呢啲頂多都只係參考;如果以公開考試作比喻,數據極其量係貼士,準與唔準始終要考完場試先知。換言之,創作人仲有「估」同「博」嘅空間。

相反,係喺互聯網年代,生產「內容」彷彿係一場無間斷嘅考試:每回答一條試題,都有幾百萬、幾千萬面目模糊嘅考官(觀眾/讀者),24小時等住mark卷。更大鑊嘅係,所有答題都會放上社交媒體,喺hit rate同演算法嘅槓桿底下,受歡迎嘅內容會迅速散播,分數越滾越高;稍為慢熱嘅內容就即刻沉底,淹沒於不斷冚上嚟嘅後浪當中。因為考官口味人人唔同,稍為小眾嘅內容,即使水準高,亦注定低分。想攞A,一定要畀出「最大路、人人啱睇」嘅答案,而呢啲嘢往往千篇一律、了無新意,亦即係鬼佬所講嘅「lowest common denominator」(最小公約數)。而最令創作人沮喪嘅莫過於「即時」兩個字。當每日有海量內容轟炸互聯網,而觀眾、讀者嘅耐性又跌到三歲水平,即時「見光死」嘅hit rate就成為創作最大障礙。表現差嘅作品唔止無翻身機會,仲會連累其他同類型口味被投資者即時厭棄、放棄。加上大數據令市場調查越嚟越「精準」,乜係「一定賣得嘅內容」老闆幾乎未卜先知。於是,市場嘅選擇越趨單一,口味亦越見保守。

如果所謂「高階毒L」係指「對流行文化胃口極大、兼且有番咁上下要求嘅人」,咁互聯網年代難免令呢啲人無啖好食。正因為咁,美國另類動畫劇集《Rick and Morty》近年居然殺出血路,實在令我等毒L感動淚崩。


「成人年睇嘅叮噹」
要向未睇過嘅朋友推介《Rick and Morty》無疑有難度。齋睇劇照,套嘢好易畀人畫功拙劣嘅錯覺,七彩繽紛嘅用色亦容易令人誤會係兒童節目。但事實係,自2013年第一季首播以嚟,套嘢唔只破咗Cartoon Network成人時段「Adult Swim」嘅收視紀錄,而且喺美國每年都橫掃幾個獎項,包括2018年嘅Critics' Choice Television Awards同Annie Awards(一個專為傑出動畫而設嘅頒獎典禮)。約兩星期前,一度傳出唔添食嘅《Rick and Morty》忽然有轉機,同電視台一口氣簽多70集,更加令全球fans開晒香檳。

咁套嘢有乜魅力呢?好籠統講,我會話係「成人年睇嘅叮噹」(我幾廿歲,唔好迫我講《多啦A夢》)。《叮噹》主角大雄某程度上係「奸角」,專門負責偷懶闖禍,而叮噹就飾演道德良心,一心將大雄呢劈爛泥扶返上壁。《Rick and Morty》就剛剛相反:外孫Morty雖則係一無是處初中生,性格尚算溫和善良;反而佢外公Rick竟然係瘋狂科學家,唔止為人縮骨冷漠,仲經常恃住IQ爆棚,穿梭全宇宙從事非法勾檔,佢甚至不惜強迫孫仔同流合污,必要時充當檔箭牌。

劇集最大特色係超密集、笑點高嘅幽默,《Rick and Morty》嘅笑位簡直斷秒計,基本上每句對白都係gag;雖然每集大概廿零分鐘,包含嘅痴線橋段至少夠荷里活開三、四部戲。我就試過唔識死,一口氣睇咗4集,結果個頭竟然赤赤痛──套嘢係就係娛樂性爆燈,不過要笑得出你必須不停用腦。

「迫你不停用腦嘅喜劇」
《Rick and Morty》之所以睇到人hang機,除咗因為集集有滿到瀉嘅流行文化reference(包括電影、劇集、動漫同時事),仲因為佢重手插入好多科幻同哲學概念。隨便舉個例,有次阿Rick個女Beth發現,老豆為咗夾走Morty陪佢四圍冒險,居然整咗個同孫仔一模一樣嘅機械人,愛嚟瞞騙家人、老師。意想不到嘅係,阿Beth最關心竟然唔係Morty嘅安危,而係……自己到底係唔係老豆整出嚟嘅另一個機械人!眼見阿女發晒癲,聰明絕頂嘅Rick忽然無晒計仔──原來諗深一層,當科技進步到一個地步,我哋可能真係無方法證明任何人係唔係機械人!痴線橋段背後,作者玩緊嘅係「何謂真實」、「何謂自我主體意識」呢啲哲學問題,仲有「圖靈測試」提出嘅,有關「機械人是否能夠好似人類一樣思考」嘅科學問題。

令人佩服嘅係,劇集原作者Justin Roiland同Dan Harmon驚死觀眾唔飽,不斷挑戰劇集嘅容量上限。試過有次,佢哋將一個原本要20分鐘鋪陳嘅歷險故事,監粗質喺頭5分鐘講完,再用淨番15分鐘,開出另一條故事線……。我直頭覺得作者「反將咗無耐性觀眾一軍」,用fast forward敘事考驗大家今時今日嘅理解能力。如果閣下喜歡《藤子.F.不二雄SF短篇集》嗰類要用腦嘅科幻作品,呢套嘢相信會飽到你call白車。

「虛無主義與特朗普」
《Rick and Morty》另一特色,係貫穿全劇嘅「虛無主義」(Nihilism)。瘋狂博士為人之所以瘋癲任性,係因為佢深信「人」係茫茫宇宙係渺小到鼻屎不如;任何所謂「人生意義」,只不過係人類虛妄嘅追求。套嘢虛無到一個點,試過有集阿Rick唔小心令所有地球人變晒怪物,結果佢唔係想辦法補番隻鑊,而係乾脆着草,帶埋孫仔移民另一個差不多嘅平行時空生活,完全當無事發生……。Justin Roiland同Dan Harmon就係有咁嘅本事,喺大量笑料、動作同星球大戰之間,滲透灰到跳海嘅主題。

講到灰,不得不提season3第七集《The Ricklantis Mixup》。故事講Rick同Morty返咗去Citadel──一個由唔同平行宇宙嘅「Rick」同「Morty」走埋一齊建立嘅星球。如果用佔領華爾街嘅比喻,星球上所有「Ricks」應該代表獨攬世上99%財富嘅人,而所有「Mortys」就代表只搵得1%嘅窮人。而嗰集內容就圍繞Citadel新一屆總統選舉:起初,觀眾會以為睇緊雞蛋對高牆──作為窮人代表嘅「候選人Morty」明知輸硬,都要挑戰唔公平嘅選舉制度;但越睇大家先至越心寒──表面上挑戰建制嘅「Morty」,根本係滿口謊話、欺騙選民嘅人渣!對照美國政情,呢集根本係對特朗普民粹主義嘅狠狠鞭撻。最灰嘅係「Morty」真係順利當選,然後圖謀榨乾民脂民膏……結局之絕望,我係香港人都睇到心噏,美國觀眾嘅感受可想而知。

《Rick and Morty》嘅成功,的確令我對流行文化有番多少希望。不過睇番第三季嘅製作人員名單,有啲集數淨係編劇都成七八個人……用咁大投資去搞高風險作品,今時今日仲又有幾多老闆肯制?無論如何,喺好嘢買少見少嘅年代,好作品大家真係要多啲支持(香港Netflix有齊一至三季,有裝嘅朋友可以隨時重溫)。

撰文:阿雞
《蘋果動新聞》前創作總監,文化雜食者,high嘢cheap嘢都啱,淨係冇中間。現為網台Booom主持cult片節目《百老匯電椅中心》,並負責附屬FB群組《百老匯電椅中心:放棄治療部》(broadwayelectricchair)

source : https://hk.lifestyle.appledaily.com/lifestyle/culture/daily/article/20180526/20401742
+++++++++++++++++++++++++++++++++++++++++++++++++++++++++++++++++
以為粗口叮噹
Good0Bad1
2018/05/26, 11:49:51 中午
本貼文共有 0 個回覆
此貼文已鎖,將不接受回覆
發表文章發起投票