西城秀樹，呢位曾經18次登上紅白、11次獲得日本唱片大獎嘅日本傳奇歌手，年輕一輩可能對佢認識唔深。但佢嘅兩位fans你一定識，一位叫櫻幸子，另一位叫梅艷芳。

櫻幸子係《櫻桃小丸子》裏面小丸子嘅家姐，佢除咗房間貼滿秀樹海報，仲成日為咗要睇秀樹嘅音樂節目而同小丸子爭電視。點解幸子會揀秀樹做偶像？咁就要從作者櫻桃子成長嘅昭和50年代講起。當年令一眾少女迷倒嘅，係被合稱「新御三家」（意即三巨頭）嘅野口五郎、鄉裕美同西城秀樹。鄉裕美以可愛美少年形象出道，野口五郎則以優美歌聲深入民心，而西城秀樹就遊走於溫柔與激情之間，迷倒眾（女）生。

風度翩翩講「我愛SM」
秀樹既可喺你耳邊甜蜜細唱《遙かなる恋人へ》（給遙遠的戀人）、蕩氣迴腸獻唱《Blue Sky Blue》；又可一邊做手勢一邊亢奮全場大合唱《YOUNG MAN（Y.M.C.A.）》，後期甚至試過半裸上身演繹拉丁舞曲《Bailamos~Tonight we dance~》，十足東洋Ricky Martin。當年現場女粉絲睇到又嗌又跳，呢種互動同狂熱喺當時日本藝能界前所未有，而櫻幸子就係其中一分子（仲成日比小丸子取笑）。

講起音樂節目，秀樹曾有一段蝦碌小插曲。話說佢喺一個音樂節目回答讀者來信，讀者問佢「鍾意邊類型小說？」秀樹唔小心將「SF」（Science Fiction）當「SM」，對住全日本觀眾講：「我喜歡SM」女司儀嚇破膽連忙尷尬糾正，男司儀就笑到肚攣繼續抽水，好一個秀樹仍氣定神閒風度翩翩，和藹可親又不失巨星風範。



撕裂唱腔獨「樹」一幟
秀樹天字第二號粉絲係梅艷芳。梅姐自小迷戀秀樹，佢曾經話：「秀樹每一個動作、台風、聲線都非常吸引，即使唔明白歌詞，都好容易投入喺佢嘅歌曲裏面。」點解秀樹嘅歌咁大吸引力？原來用咗必殺技。話說當年佢憑《ちぎれた愛》（撕裂的愛）第一次登上Oricon第一位，用嘅就係一種近似husky voice嘅沙啞聲線演繹，之後更將呢種唱腔命名為「絕唱」，成為獨「樹」一幟嘅必殺技。

秀樹吸引力又點止日本同香港，最勁一次係1998年「日中友好條約締結20周年」喺萬里長城舉行露天音樂會，簡直連外交官都做埋。2003及2011年，秀樹歷經兩次中風，但依然無放棄人生，努力進行復康之餘更推出自傳《あきらめない：脳梗塞からの挑戦》（別放棄從腦梗塞挑戰），情況更一度好轉，今年4月喺露天舞台演出……如今巨星殞落，樂迷無不心酸，但正如梅姐所講，秀樹每一個動作、台風、聲線，都永遠存活樂迷心中。

撰文：永高（日本文化愛好者）

source : https://hk.lifestyle.appledaily.com/lifestyle/special/daily/article/20180519/20394892
+++++++++++++++++++++++++++++++++++++++++++++++++++++++++++++++++
勁