https://video.appledaily.com.hk/mcp/encode/2018/05/13/3610499/20180514_sub289newAD_clean_w.mp4


現在只有閒日，大澳人才可以如常踩單車穿梳往來。

遊客多，但Suppose每周賺到笑的大澳人卻耍手擰頭，喊遊客太多頂唔順。我哋就數吓，大澳游客七宗罪，問心，你有無份？

第一罪：出入打蛇餅
假日上午11至12時的東涌與傍晚5至6時的大澳巴士站，依次出現幾百米蛇餅。原居民出入都要排成個鐘頭隊，我問隊尾的村民多數排幾耐，佢：「好快！半個鐘！最多九個字。」咁多人，「半個鐘」確實係快，但若生活於此確係激心。八十多歲的大澳婆婆叉腰：「幾十歲點企咁耐等車呀！」她說長洲碼頭有「長洲居民乘船特別通道」，希望大澳都參考吓。

第二罪：俾條生路嚟行
大橋與大街人滿為患，「貓舍」老闆German：「居民平時單車代步，但人太多踩唔到單車啦，街坊推車送貨都難。平時10分鐘路程，20分鐘都唔知到唔到，響鐘仲要被人鬧。依家假日大澳人一係唔出街，一係棄車，一係繞小路走。」


自稱大澳婆婆的她，開小店賣汽水，遊客多並未為她的小舖帶來更多生意，但諗起出入時的超長人龍就呢個樣。


周六日下午三點，大街、行人橋到迫到市集咁。

第三罪：亂影相
大澳最美的風景就是人，造船廠老闆周錦棠：「個個都想影特別相，就捐窿捐罅，食食吓飯有人會喺窗口影你相，無啦啦喺屋企騎樓影雀，真係無形滋擾。」

第四罪：擅闖民居
棚屋棧道四通八達，但其實是私人走道。影相亂走是其一，好奇又不想回頭者，索性點過頭就穿越居民大廳而過，正在洗內衣褲的伯伯已無感：「煩，都唔知乜人。話唔到啦，咪由佢行囉。」

第五罪：亂丟垃圾
人多食店多自然多垃圾，垃圾桶塞爆，清潔工人一日走兩三轉清理。環保精品店「EARTH.er」店主Benny：「垃圾，小食包裝紙丟入你車個籃度，或者見舖頭無開就攝喺人鐵閘，或丟在門口，好討厭啊！」


下午五點，出城人龍延綿幾百米屈返入市集，還好巴士夠密，半小時到45分鐘可上車。


遊客愛亂闖，三盞燈對面棚屋民居，棧道上豎着「非請勿進」紙牌，小狗守在門口。

第六罪：態度差
承上題，出來玩有時總會有失禮之舉，影完相、亂闖民居、亂塞了垃圾被發現被人話，下意識自我保護：「搵唔到垃圾桶嘛！」「好叻咩！」「使唔使咁緊張呀！」遊客掃興，居民食埋一肚氣，齊齊排外。

第七罪：亂闖亂玩
行山行到身水身行，入邨見乾淨公廁的街喉，梗要用吓或洗吓面，那其實是私人地方。村的另一頭有造船廠，船廠老細周錦棠：「試過一班行山客坐喺我新整的船模裏聊天，個船底一定要滑淨的，刮花了我交不了貨啊！最驚係呢度多易燃物品，你唔知道但食住煙入來，就好危險了。」

記者：陳慧敏
攝影、剪接：leo@BBfimlmaker

source : https://hk.lifestyle.appledaily.com/lifestyle/special/daily/article/20180514/20389964
+++++++++++++++++++++++++++++++++++++++++++++++++++++++++++++++++
變曬煩膠