近來多聞年輕人自殺有感

香港嘅經濟命運，其實好耐之前，從炒樓可以致富嘅時候，已經判咗死刑。

房屋物業作爲生活必需同生產要素，最好係保持合理價格同市場平穩。
九十年代嘅地產狂潮，其實已經挖空咗香港經濟。
呢個，亦係香港人作爲一個整體，自私自利嘅共業。

http://static.alsosprachanalyst.com/2011/01/Hong-Kong-Real-Estate-History-in-a-chart1.png

塘水滚塘魚，
受惠物業升值而身家暴增嘅人，只係間接剝削緊下一代嘅年青人，
上一代人憑着運氣，輕鬆步入中產，遺下居高嘅樓價
新一代年輕人就忍受高樓價，用微薄嘅薪水日捱夜捱
上一代人唔會認爲，自己嘅財富只係建基係後來者嘅屍骸上面。
反而，佢哋會認爲一切，都係自己獨到嘅眼光看準時機，低買高賣，全憑自己嘅聰明才智。
"年輕人搵唔到食？因爲佢哋讀屎片，我哋當初都冇咩教育咪一樣捱世界"
涼薄説話何其多，多到令人啞然失笑。

呢個零和遊戲入便當然有好多人接火棒，結果就係負資產燒炭。
當中當然有人係為炒賣暴富而盲目入市，但亦有營營役役為求有安樂窩嘅人。
佢哋會大力鞭荅政府冇防止樓價下瀉。但，其實係炒賣之下，點都會有人死。
分別在你依家班負資產死，或者將來樓價繼續高企下置業人士死。
常言道沙士掏空香港中產，但我不禁反問，呢班中產係點樣嚟？

樓宇，作爲會折舊嘅物品，唯一非炒賣升值潛力在於社區環境改善，實質需求增加。
但香港作爲一個已發展地區，仲有幾多空間去引入移民提高需求？
正常而言，樓宇係會隨折舊而貶值，加上維修等支出，根本就唔應該祈望有升值潛力。
華人，應該係唯一會炒樓嘅族群。

再睇真啲，零和遊戲並非零和，係負。
擁有資金者透過買入置產輕鬆回報，仲有幾多人會捨易取難去發展實業？
君不見時下年輕人，問渠哋夢想係何物，只想有一個蝸居，或者做公務員
當個個年輕人都想做公務員嘅時候，呢個社會好快玩完
作爲生產要數，資產價格導致創業成本高企，仲有咩年輕人會出嚟闖世界？
即使冇鴻鵠大志，只係想開間街坊小點，都會被租金吸干薄利
貧富差距不但出現在世代之間，仲存在係資產階級之間。
社會流動？我諗你未瞓醒。

些少數據：
香港樓宇供應： 2,647,700
香港家庭住戶數目(剛性需求): 2,410,000
空置房屋: 237,700

豪宅(1600呎以上)空置率: [red]14.1%[/red]
細單位(400呎以下)住宅空置率: [blue]2.3%[/blue]
(自然空置率約4%)

信研會