http://hkm.appledaily.com/detail.php?issue=20171013&guid=57327711&category_guid=7018882&category=instant

一年一度韓國影壇盛事第22屆釜山國際電影節噚日正式揭幕，同時「第26屆釜日電影獎」亦於今日舉行。

「第26屆釜日電影獎」一開場先獲發各幕後獎項，之後就頒發各新人獎，最佳新人男演員方面就由《夢中的簡》嘅具喬煥撼贏《青年警察》嘅朴敘俊、《女教師》嘅李源根等人得獎，女新人獎就由《朴烈》嘅崔熙瑞奪得。

最佳男配角及女配角分別由《不汗黨：壞傢伙們的世界》嘅金熙元及《軍艦島》嘅小演員金秀安奪得，年僅11歲嘅金秀安得獎時大感興奮，更感動落淚，佢喺台上多謝同佢合作嘅演員，同時司儀就叫佢重唱《軍艦島》中嘅歌曲，金秀安自言佢有一年冇唱過，不過佢最終都哼咗幾句。而特別獎釜日電影觀眾獎之一就落喺今年第一部過千萬人次嘅韓片《逆權司機》身上。

到頒發影帝同影后，由去屆得獎影帝李秉憲及影后孫藝珍頒獎，最終影帝由大熱嘅宋康昊憑《逆權司機》撼贏權海孝、鄭雨盛、李帝勳及趙震雄奪得，影后就由《酒神小姐》嘅尹汝貞奪得。

宋康昊得獎時就話：「喺呢個大型場合得知獲得咁有份量嘅獎，好想講聲多謝，亦多謝Thomas、劉海鎮等演員。《逆權司機》依然有不足嘅地方，但依然感謝1200萬觀眾入場支持，想將呢份獎項嘅榮耀分享畀所有支持《逆權司機》嘅觀眾。」

而《逆權司機》同時奪得最佳作品獎。

得獎名單：
最佳作品：《逆權司機》
最佳導演：金成洙《阿修羅》
最佳男主角：宋康昊《逆權司機》
最佳女主角：尹汝貞《酒神小姐》
最佳男配角：金熙元《不汗黨：壞傢伙們的世界》
最佳女配角：金秀安《軍艦島》
最佳男子新人演技獎：具喬煥《夢中的簡》
最佳女子新人演技獎：崔熙瑞《朴烈》
新人導演獎：李賢珠《戀愛談》
最佳劇本獎：《朴烈》
最佳音樂獎：《惡女》
最佳美術獎：《軍艦島》
釜日電影觀眾獎：《逆權司機》
資料來源：釜日電影獎