歌手吳業坤及王灝兒（JW）日前接受無綫娛樂新聞台《StarTalk》專訪，大談二人合唱新作《原來只因深愛著》感受。二人互笠高帽，吳業坤大讚JW性格樂觀和大情大勝，每次見到對方總是開開心心：「性格樂觀都會係我搵另一半嘅條件之一，因為唔想成日咁負能量。」

保留發展機會
問到二人能否過電時，JW説：「一定唔會Work，大家都唔係大家杯茶，我就連今次合唱都接受唔到對望、拖手或者有其他親密接觸，如果我都說服唔到自己，我點說服到觀眾呢，所以我同公司講我哋唔可以以情侶擋姿態合唱。」但吳業坤表示會保留少少發展機會，立即令JW一臉驚訝。

想識超蓮
吳業坤亦趁機要求JW介紹好姊妹何超蓮給他認識，JW説：「上次同超蓮去睇周柏豪演唱會，吳業坤咁啱坐喺我哋前面，不過原來超蓮一直冇為意，完全唔知道吳業坤就坐正喺佢前面。其實超蓮知吳業坤係搞笑，唔係真係想識佢，費事到時真係傳咗緋聞，超蓮實殺咗我！」

為吳業坤平反
JW亦為吳業坤平反，大讚他好醒目，又勤力同有創意，其實他骨子裏好搞笑，JW說：「同佢一齊做嘢會好開心，佢講嘢口花花咁好笑，亦證明佢唔係宅啦！只係出面啲人以為佢喺宅。嘩！我諗我講得佢太多優點，係我嘅頂點！」吳業坤見狀即取笑JW樣貌平庸，指她沒有甚麼缺點，只是肥了和矮了一點！