http://hk.apple.nextmedia.com/enews/realtime/20170606/56791574

正服兵役嘅韓國天團BIGBANG成員T.O.P，上周四被爆去年10月吸食大麻遭檢方不扣留起訴，而T.O.P就由噚日起被調職至第4機動隊。不過噚日T.O.P現身時面帶微笑，被網民批評他沒有悔意。

韓國方面今日傳出消息，指T.O.P今早被發現昏迷喺服役嘅第4機動隊內，於香港時間早上10時30分被緊急送到首爾某醫院嘅急症室。
香港時間下午4時左右，T.O.P被轉到深切治療部，目前仍未恢復意識。

據T.O.P身邊嘅親友表示：「T.O.P正檢查中，目前仲未有結果，但有服用藥物嘅可能性。最近發生好多事，加上轉到第4機動隊，應該係因為壓力太大，希望佢可以快啲恢復意識。」警方推測T.O.P服用過度嘅鎮靜劑。

及後T.O.P所屬嘅YG事務所表示：「T.O.P因服藥過度被送到急症室，目前T.O.P母親正喺醫院陪住佢，其他狀況未能詳細回應。」港台傳媒均有報道，指T.O.P有可能是服藥輕生。

有傳T.O.P已經恢復意識，不過所屬事務所於6時25分左右否認T.O.P恢復意識。

1936：再傳T.O.P已經恢復意識，不過YG未有回應恢復意識嘅傳聞，僅對T.O.P入院一事表示震驚及傷心：「目前仍然未能確定T.O.P昏迷幾耐先被發現，依家只能繼續等T.O.P恢復意識」。

1953：據韓媒《EDAILY》表示，T.O.P親友受訪時透露T.O.P患有恐慌障礙及抑鬱，知道佢有接受藥物治療，唯該親友唔知係鎮靜劑，該親友又指T.O.P噚日曾經同母親傾電話，T.O.P稱「過得好好」，對於今日發生嘅事感到震驚。

2011：T.O.P方面嘅相關人士指，T.O.P目前依未恢復意識，推斷要留院觀察1至2日。