意大利影婚紗相晒4吋事業線王君馨：歐洲影相會有少少性感

http://video.appledaily.com.hk/mcp/encode/2017/05/21/3351106/20170521_RTent_02_new_w.mp4

31歲王君馨，喺舊年11月同細佢10日嘅圈外男友Daniel入紙排期結婚，而排期後3個月就要簽紙註冊，佢哋喺法律上已經成為夫婦。而婚禮方面，王君馨早前宣佈會喺7月11日舉行。

君馨今日就喺ig勁post婚紗相，相中佢分別着咗兩套婚紗，仲各自hashtag咗位於意大利佛羅倫斯同匈牙利首都布達佩斯。其中佢喺佛羅倫斯嗰套婚紗真係極為性感，王君馨仲將相放咗喺佢嘅自家品牌ig，喺西裝褸之下，王君馨仲谷行胸，非常之咁「偉大」。

君馨今日接受傳媒訪問時透露西裝褸款婚紗係由Marco M Chan設計，但自己都有份畀意見，佢話﹕「咁多件入面，剩係得呢件西裝褸將來可以後着返。」問到老公Daniel有冇投訴太性感？君馨話﹕「係歐洲影相就知道會有少少性感嘅，因為地方非常之華麗，啲衫同埋相出嚟嘅感覺都比較Fashion。行嚟行去嘅時候都有個頸巾包住，係影相先除頸巾，So it's ok.佢仲覺得我很漂亮，尤其是係冇化妝的時候。」而君馨將於7月11日喺美國會擺酒，佢話自己都好期待。

而王君馨好友苟芸慧男友陸漢洋噚日亦有喺fb放閃留言「52099」，雖然「520」用廣東話讀係「唔要你」，不過苟姑娘母語係國語，咁就變咗「我愛你苟苟」非常之咁貼心，睇嚟下個影婚紗相嘅好大機會係苟姑娘。