http://hk.apple.nextmedia.com/enews/realtime/20170521/56723787

欣宜同周秀娜嘅電影《29+1》上映11日，截至噚日嘅累積票房有769萬港元，成績非常之好。早前女主角之一嘅欣宜，仲預告會代表電影出發去尼斯影展，喺法國逗留三日。（新聞連結： http://bit.ly/2qDRECE ）

欣宜呢次去尼斯影展其實身負重任，因為佢獲提名角逐外語劇情片最佳女配角，導演彭秀慧就角逐外語劇情片最佳導演，而《29+1》又有份提名外語劇情片最佳原創劇本同最佳外語劇情片，今日電影傳嚟好消息，彭秀慧成功為港爭光，贏得外語劇情片最佳導演一獎。
彭秀慧得獎後開心表示：「四個提名已經係好大榮譽，更加開心嘅係今次得獎嘅時候，難得有好多人同我一齊出席頒獎禮，分享喜悅。」至於欣宜雖然失落獎座，但就覺得有份提名已經好榮幸，仲讚彭秀慧執導過程每步都親力親為，呢次奪獎證明努力係有所回報嘅。