喺香港長假期將結束之際，美國國會就一國兩制20年進行聽證會，預料係為美國《香港人權及民主法案》鋪路。成個聽證會，我落筆果刻係未完，但 彭定康 同林榮基嘅證詞，係最重要嘅證詞，林榮基嘅重要性不言而喻，佢就係一國兩制走數嘅鐵證。但 彭定康 嘅證詞，對依家仍然係十分重要，佢嘅證詞對英國政府會帶嚟相當嘅壓力，特別喺BREXIT將近嘅時候。

彭定康 連英國政府都鬧埋

彭定康 其實大可以堅持英國政客同過往總督嘅原則，對香港事務不聞不問，但好明顯，香港已經係不光榮撤退。英國人最愛嘅送殯歌係Frank Sinatra嘅My Way，其實呢首歌歌詞，反映英國人最怕係生後留有污名。所以 彭定康 今年不單出席埋美國國會嘅聽證會，仲再一次講，英國人已經令黃之鋒嘅父母一代失望，英國人唔應該再令黃之鋒呢一代人失望。 彭定康 明知Marco Rubio將會煮中國重米，特朗普都會，佢喺美國國會講呢句嘢，就係對英國政府施壓，喺美國國會面前咁數英國政府。

當然，彭定康喺歐盟咁耐，佢當地知依家英國BREXIT舉步維艱，唔理邊個黨贏得大選，除非英國政府當機立斷，叫停BREXIT，否則英國一定要嚴重有求於美國，至能度過BREXIT難關，唔藉呢次機會迫保守黨政府喺香港問題上堅做嘢，又更待何時，呢個係好多中國式民族主義者，特別果啲成日話英國無用果啲大中華仆街膠永遠唔會明。無錯，英國有啲人可以好背信棄義，例如賀維，例如戴卓爾夫人，呢啲人嘅帳我一世都記得，但有啲人，係絕對知道何謂有為有所不為， 彭定康 勳爵係其中一位，彭定康無欠香港人嘅，相反，其實有部分大中華左膠對英國人嘅不公指責，係理應指斥。

我可以講，一旦《香港人權及民主法案》通過，美國一定喺香港問題扮演更強勢角色，喺BREXIT之後更依靠前屬地同英國之間關係，突破BREXIT困境嘅英國，如果想保持喺香港嘅地位，BNO平權、解決BNO繼承權問題，以及喺香港民主問題上採取更強硬角色，確保中國信守國際條約，呢個十分重要。如果啲人以為英國BREXIT難保就會唔理香港，呢啲只係大中華膠，或一啲自以為好醒膠嘅無知。






https://martinoei.com/article/14145/彭定康-嘅歉疚，英國對港政策面對嘅壓力