由細到大已經俾人罵慣,係屋企入面完全感受唔到愛,日日提心吊膽驚俾人罵
每日得10蚊飯錢買面包,無零用無利是無試過慶祝生日
年年都要自己儲錢買2手書,校服壞左自己補
一有關於錢/前途既野同佢地商量就會俾人罵
由高中開始就日日話我係蛀米大蟲,正一垃圾點解仲要繼續讀落去
學校成績都係一般般,屋企人有同我講過寧願我出去做雞做援交好過晒時間讀書,連DSE都差啲唔俾我報考,要老師出面+借一部分錢俾我先搞得掂
study leave開始無幾耐之後佢地問我無返學係咪搵到野做,我話我想溫書考入大學,佢地乜都無講就一巴打落黎,話就算入到都一蚊唔會俾我讀,之後我再無同佢地講過野,諗住鎖自己係房溫書過一排就無事

果陣我係到諗,入到大學就可以脫離佢地,我由中二開始已經無叫過佢地做爸爸媽媽,佢地配唔上呢個名

琴晚係自修室返左黎,去到房面前發現度門已經俾人拆左,房入面啲notes同書已經無晒,我即時衝出去廳同佢地理論,眼淚鼻涕都出晒黎差啲跪埋,問佢地係咪收埋左唔俾我讀,求佢地俾翻啲野我,佢地答左我一句:去堆填區搵啦賤人
我當時成個人呆左,坐左係地下到起唔到身,後尾腳震震咁行左返房,果晚成晚啲眼淚一直無停過,一路訓起到um住自己個口唔喊出聲,唔知過幾耐先訓得著

今朝起身我對眼已經紅晒腫晒,佢地見到我起身第一句就同我講我自己去勞工處搵工,如果唔係就會唔會再養我,我當時一句都無應佢地,換完衫就落左去圖書館用電腦上裝網搵notes+PP睇(我屋企無電腦用),我唔知自己仲可以撐到幾耐,我唔知係DSE完之前佢地仲會唔會又第二啲方法折磨我,我唔知我今晚返到屋企會點,我唔知我仲會唔會返到果個叫做屋企既地方

我唯一知既係,我好勊,我真係好勊,細個曾經想做兒童插畫師,想追夢,想自立唔洗受人氣,唔洗睇人面色,原來以為已經好近,點知原來只係我自己發夢,真係好笑
由細細個開始就唔太識同人溝通,唯一有興趣既就係畫畫,我唔算畫得靚,但至少我覺得畫畫果陣我可以表達既野多過我講既野,同學都覺得我係個怪人,所以我無乜朋友,呢點我唔介意
我最諗唔明既係點解連生我出黎既人都要咁對我,係父母眼中一文不值,甚至俾人叫過去做雞既感受,又有幾多人會經歷過?
有時我會諗,如果我係男仔,如果我讀書好啲,如果我唔係鍾意畫畫而係想做醫生,佢地會唔會對我好啲呢?我諗我一世都唔會知道答案https://www.facebook.com/schools.secrets/posts/772587442902673