http://nextplus.nextmedia.com/news/latest/20170315/486863社區組織協會主任何喜華五年前獨排眾議，瞓身力撐689做特首，但之後才發現自己誤墮政客「騙局」，佢前年接受本刊專訪時，唔止後悔仲話「唔會再相信任何政治人物」，但言猶在耳，《壹》仔聽聞何喜華今屆選舉已有新支持目標，就係曾經做過社置署長嘅林鄭。



雖然何喜華至今好似未公開表態，但林鄭似乎就當正佢係自己友，月初講開自己政績時，已經擺咗何喜華上枱，叫記者「問吓何喜華，佢話我係歷史上最好嘅社署署長」，其實何喜華過去都大讚過林鄭扶貧做得好，據知佢嘅團隊有幫林鄭做競選，唔只口撐林鄭，仲身體力行幫手穿針引線，曾經搵過深水埗明哥出席林鄭個同行競選誓師大會，可惜就被明哥拒絕咗。

《壹》仔問過明哥，佢直認三個候選人都搵過佢，但因為想保持中立，所以三個都唔表態撐，不過就希望佢哋無論邊個當選，都可以平衡到投資者同基層利益，佢亦樂意配合。但講到心目中人選，佢就希望係比較中和嘅候選人可以做特首，咁先能夠團結到香港兩邊力量，唔會令香港繼續撕裂。睇翻三個候選人，一個提名全部來自泛民，另一個就全部來自建制，唔通剩番嗰個係明哥心水之選？