http://hk.apple.nextmedia.com/realtime/sports/20170312/56416286香港體壇又傳捷報！繼「神奇小子」曹星如K.O.日本拳手向井寬史取得21連勝，香港桌球手傅家俊（Marco）上周六喺威爾斯舉行嘅球員錦標賽4強克服落後3:5劣勢，以6:5反勝中國球手丁俊暉，將會喺決賽火併英格蘭嘅鄧立普，力爭個人第4個排名賽錦標！19局10勝嘅兩節決賽，分別喺香港時間今晚9點同凌晨3點上演。（有線637台今晚9:00pm直播第一節、3:00am直播第二節）

呢場4強戰戰情緊湊，其中Marco喺第3局造出「century」106度先聲奪人，領先2:1，第4局更一度領先55:2幾乎夠分，但小丁打出一cue 54度清枱下險勝56:55，將局分追平2:2，雖然Marco再度領先3:2，但小丁其後連取3局，距離今季第3個排名賽決賽只差一步。不過，Marco未有氣餒，連下兩城追平5:5；嚟到決勝局，小丁首先有「埋枱」機會但未能把握，結果Marco以一cue 98度奠勝，以6:5晉級決賽，力爭繼去年蘇格蘭公開賽後再奪排名賽錦標，兼爭奪12.5萬鎊（約118萬港元）獎金！
Marco賽後表示：「喺領先3:2下，我犯咗啲好唔小心嘅『安全波』錯誤，你對住丁俊暉唔可以犯呢啲錯，但我好高興能夠喺落後3:5下反勝，晉級決賽。」對於鄧立普喺一個月內3次躋身排名賽決賽，Marco就盛讚呢位決賽對手係近期狀態最好嘅球手，一定相當難打，但自己今年1月喺大師賽16強交手贏過6:5，希望打出好嘅桌球，並期待呢次挑戰！