http://hk.apple.nextmedia.com/realtime/sports/20170310/56409356恭喜星如！香港拳王曹星如（Rex、20勝0和0負，12K.O.）聽日就會喺灣仔會展上演嘅「王者對決2」壓軸戰，同日本拳手向井寬史（13勝3和4負，3K.O.）力爭3條金腰帶，包括WBO超蠅量級亞太區拳王金腰帶、WBO超蠅量級國際拳王金腰帶，以及WBC超蠅量級亞洲拳王金腰帶。兩位拳手今日喺奧海城進行過磅儀式，近日所見消減不少嘅星如，最終以115磅順利過磅，可以全力備戰聽日拳賽，力爭21連勝！至於對手向井亦以115磅過關。

不過，星如順利以115磅過磅，原來過程似過山車，佢去到場地仲差0.2磅先達標，「一嚟到就不斷焗汗，但等待過磅時，聽到司儀不斷叫其他選手過磅，心諗就快到我，好緊張。」難怪星如過到磅時放下心頭大石，即刻抹一把汗。星如話今次已經唔算最驚險，有次上磅唔達標，即刻用兩個鐘跑步減磅，感覺到條腸都一齊跳動；而家星如減夠磅，唔洗再節食喇，佢話雖然有好多嘢想食，但怕食滯，所以都係簡簡單單食番意粉，補充足夠水份，等待聽晚決戰對手。