https://www.facebook.com/photo.php?fbid=10155793943035130&set=a.10150970639360130.535188.690555129&type=31945年中國國民政府接收日殖台灣，台灣人熱烈歡迎，期待中國同胞解放台灣。可惜台灣人｢回歸｣後發現事與願違，原來只係另一個更殘暴嘅殖民嘅開始。政府獨裁加上裙帶關係盛行貪污猖獗，所有政府機關、法院、公司、社會上層全部都俾中國人壟斷晒。係中國人眼中，台灣同胞被殖民過、皇民化、唔識講國語，只係血統唔純正次一等嘅奴民，需要被統治同教化。

講到呢度，有冇人覺得同香港嘅幾分相似，｢要不是我們中國人，你們這群英國狗r香港豬r最就完蛋了!我們給飯你吃r，給水你喝r，還說甚麼他媽的民主!｣呢啲金句言猶在耳。係中國人眼中，1997年係解放香港，之後要幫香港人去除英國人嘅陃習，學習標準普通話寫規範字成為中國人。

國民政府除左獨裁之外，仲推行一大堆荒謬嘅社會經濟政府，包括將柴米油鹽糖煙油等等都列為國家專賣，導政嚴重通脹、糧食短缺、大量失業，部分台灣人唯有賣私煙求生。1947年(國民政府接管台灣之後兩年)2月27日，專賣局以暴力手段緝私煙，造成一死一傷，引發群眾2月28日示威抗議，政府衛兵開槍掃射。全台灣爆發中國人同台灣人嘅衝突，國民政府從中國調動軍隊入台鎮壓屠殺，死傷無數。之後台灣進入白色恐怖時期，大規模政治清算，戒嚴38年間精英殆盡。

中共同當年國民政府一樣，都係中國人政權，奉行極端中國國家民族主義(中國法西斯)，不過再加上猜忌、鬥爭、支配等共產黨特質。所以中共係賤視香港人，亦唔信任香港人，覺得香港人打亂種養唔熟，需要再教育(亦即係再殖民)。大家成日講既根正苗紅同香港人有根本上嘅矛盾。

良禽擇木而棲係正常不過，但一大堆愛(中)國派卻天真認為真係有得揀。佢地相信只要對中共唯命是從，就可以升官發財一世無休。又或者不斷澄清自己只係爭取民主、只反奸臣不反皇帝，就能做永遠嘅忠誠反對派，永續撈政治。如果呢班愛共派有幸睇到我呢篇文章就會明白自己嘅悲哀，唔明白嘅就請睇下曾蔭權、許仕仁、潛逃美國嘅左報助理總編龍鎮洋，本地親共商家亦都有苦自己知。

係中共猜忌嘅本質同中國法西斯主義雙重因素底下，香港人係唔會有生存空間。

香港人以為｢回歸祖國｣，相信血濃於水，乖乖地就會有民主、有錢掙、有馬跑、有舞跳。殊不知係中國人眼中，你只係血統唔純正又養唔熟嘅，需要再教育。而你呢班人爭取民主同爭取獨立係冇分別，一班養唔熟嘅加上一個自己選出黎嘅政府同議會、獨立嘅社會制度、司法、邊境、貨幣、語言、文字……(下刪百樣)，擺明就係造反搞獨立。
呢個就係香港人嘅悲衰，一直以為有選擇有希望，到頭來都係俾人出賣遺棄賤視。香港人嘅存在本來就係不合中共嘅法，就係有原罪。想做奴才? 輪唔到你。想做忠臣? 更加冇呢回事。爭取民主? 姐係香港獨立。想做血濃於水嘅同胞? 要不是我們中國人，你們香港人早就完蛋了。

我地唔需要中共定義我地係邊個，我地就係我地，就係香港人。我地擁有自由係天經地義，與生俱來嘅權利。點解爭取民主獨立係罪名? 難道殖民就大條道理? 唔認自己係中國人又係罪名? 你都唔覺得同我地血濃於水丫(除左攞我地著數果時)。

最近法國電視台同我做左個訪問，最後問左一條問題: ｢你地爭取獨立要面對中國咼，準備好抗爭未?｣ 我只係簡單地答: ｢準備好了。 Freedom is not free.｣。台灣經歷228、白色恐怖，精英走嘅走死嘅死，戒嚴38年精英殆盡，本應永不翻身，自由不再有機會實現，但歷史話俾我地聽，短短幾十年台灣已經係一個政黨和平輪替三次嘅民主國家。人民渴求自由嘅火種一旦點著左，就唔會熄滅。相對之下，今日香港依然有好好嘅條件，228亦未臨到，所以請大家千祈唔好懷憂喪志、怨天尤人。
最後引用係228事件犧牲嘅畫家陳澄波嘅遺言，｢這次為十二萬市民解圍，得今次殺身之禍，解決民族之自由，絕對問心無愧矣。｣ 如果聽日就要離開世界，希望大家能夠驕傲講出以上呢一句，因為你曾經為自由同尊嚴而戰。