http://hk.apple.nextmedia.com/enews/realtime/20160404/54947442
魯芬、江圖、麥翠嫻、劉少君、雪梨等今日喺火炭為音樂話劇《香港過來人》拍攝劇照，魯芬透露喺劇中飾演榕樹頭賣唱嘅歌唱家，佢話：「0依家都仲有人唱緊，唱到永不言敗，我好尊重佢哋，不理風雨都咁堅持，好值得我哋欽佩。」原來魯芬喺70年代都有唱歌，雖然當時冇出碟，但佢覺得唔係遺憾，反而學識好多唱歌技巧。

講到噚晚香港電影金像獎，魯芬表示有睇，覺得賽果ok，不過佢就呻冇飛入場睇。對於電影《十年》奪最佳電影，但有好多唔同嘅聲音，魯芬話：「我未睇，但有聽朋友講，既然拍得部片有聲音出嚟，我覺得冇乜問題，作為老百姓都有聲音，我都會有聲音。」

有指《十年》遭內地封殺，怕唔怕對香港電影有影響？魯芬話：「我覺得冇問題，大家多啲溝通囉，祖國係我哋嘅媽媽，就要聽媽媽話，媽媽係最緊要，所以一定要支持，社會上有唔好嘅嘢，大家咪去化解、和諧啲，我哋啲水可能燥啲，大家要飲多啲涼茶，大家多啲包容；老百姓都係求有碗飯、有瓦遮頭。魯芬好衷心希望香港精神，大家做到最好，自己喺自己崗位，要安安樂樂，家和萬事興，呢個係我心聲。」

講到亞視喺4月1日熄機，身為前亞視藝員、今年80歲嘅江圖表示當晚有睇住熄台，佢話：「我做過好多劇，心痛當然心痛，點解隔離台搞到咁好，我哋個台搞成咁，亞視要更加好就一定要有劇集，香港人鍾意睇熟面口嘛，雖然內地劇集好好，但觀眾覺得冇乜親切感，好可惜，50幾年就咁完咗；我希望再有新電視台出現，得無綫喺度，唔係幾好，做獨腳戲，如果將來有一個新電視台，希望搞得成功，我雖然老，但會睇住。」