網上「瘋傳」一則停車場「寸嘴」告示，主題是停車場管理公司禁止人餵飼流浪貓，但內容卻肆意批評餵貓者住公屋，「一個車位月租，貴過你住的公屋租金」，要求愛貓之人檢走流浪貓，結果惹來網民怒轟告示歧視窮人。

該張告示的相片被網民瘋傳，雖然照片並無注明地點，但網民估計停車場應位於公共屋邨內。告示指車場內有閉路電視，如果貓隻有植入晶片，一旦車主報警，貓主就要負責賠償。

雖然有網民認同停車場不宜養貓，但不滿告示用字刻薄，「講嘢要有口德，唔係提醒有錯，如果餵貓係車場老細，睇下你仲夠唔夠膽咁大聲。」

「一條生命咩價錢？」

香港群貓會發言人陳小姐指流浪貓普遍膽小，很少住在車來車往的停車場內，批評停車場告示不應標榜車價貴，「你點定義一條生命咩價錢？你又點知隻貓值幾多錢？」

她指如果車主討厭貓隻，可放檸檬或橙等對貓隻而言屬刺鼻味道的東西在車上，貓隻自然不會接近，她又建議車主開車前先拍一拍車身，嚇走躲在車底的貓隻。

車主估計停車場求自保

汽車工業學會會長李耀培表示，只要車主平日有打蠟習慣，貓隻一般很難抓花車身，反而以往曾有貓隻或老鼠躲在車胎上或引擎室取暖，遭不為意的車主開車輾死，車房一般會收取約1千元的清理費。

李耀培質疑告示是停車場為求自保的「霸王條款」，「出張告示話你知，依家警告咗你，以後架車花唔好搵停車場賠」。他認為停車場不應以一則告示撇清所有責任，理應要安排職員巡邏管理流浪貓。

網民點睇：

Catherine Wong：如果架車係咁巴閉嘅，而又咁有錢唔係住公屋，做咩唔買層樓大啲泊埋架車入去吖嘛！

Jackey Lee：有乜嘢車擺係街喥唔花㗎？擺得出街就預咗花㗎啦，多Q餘！

Almon Yuen：邊個車場咁串，我都想去餵下貓。

Jimmy King Hung Yu：雖然用詞難聽，但也不無道理！

Jovianne Tang：意思無錯，但做法有問題。

Benny Lau：一句到尾，有人係妳屋企門口放啲貓狗痾屎痾尿妳哋有咩感受？