http://video.appledaily.com.hk/mcp/encode/2016/12/01/3221030/20161202_Vsub31newAD_clean_w.mp4


雲海的新詩夾雜文言文、廣東話、英文，刻意不拘一格，專登唔跟規矩，三百首詩逐一WhatsApp畀編輯，夠晒玩嘢。

雲海是……
有仇必報大方丈？
挑機政府耐力王？
靈異外星觀察家？
極速寫詩黐線佬？

以上皆是。

佢唔係陳雲。
佢係陳雲海。
認錯者請認錯。

雲海係狂人，出心出力谷盡體內復仇DNA，向得過且過的公務員開拖，你玩嘢，佢同你玩到天腳底，再玩到地殼內，依然咬住唔放，耐力驚人。最近佢再度發癲，唔騷耐力，比大家見識佢嘅速度：18日寫起300首新詩，快到黐咗線。

「原來我黐起上來真係好黐，呢本詩集真係黐筋。」詩集，黐筋，無錯，實體，就出。書名叫《雲詩三百首》。既然另類，就另類到盡。佢WhatsApp交稿給編輯。「我以前好堅持用原稿紙，新時代就用WhatsApp。」睇真啲，書封面水墨畫中人舉起嘅唔係酒杯，係手機。李白舉杯邀明月，雲海舉機賦新詩，有趣有趣。

你講，出詩集係咪你嘅生涯規劃？「我從來冇諗過出詩集，過了四十幾年，呢樣嘢係隱形嘅。」出版原因原來係三分玩撈埋七分真。「有個識咗十幾年，幫我編鬼古書嘅前博益編輯，好有心攞啲積蓄開咗間出版社，一個女仔one man band，自己對稿，自己排版。佢話參加咗九龍城書節，半客氣問有冇乜搞作，我半開玩笑咁話『不如我出一本詩集』，佢就問『係咪真呀』，因為要11月要對稿同埋印，10月尾一定要寫晒稿。」12月頭要出版的書，10月仍未仍未動筆，真係借外國勢力甚至外星勢力都搞唔掂，最終佢竟然趕及10月31日交埋最後一首。難道真係李白上身？原來佢企又寫，坐又寫；行行下街寫，搭搭下車寫，最高峰一日寫咗30幾首，好癲。

佢口講要衝擊下一潭死水咁嘅文化界，實質想力撐這位有心的編輯。「唔使簽合約，我信得過佢，賣到錢也不用畀稿費我，一齊去食餐好就得。」餐飯豐唔豐盛，要睇有幾多讀者陪佢癲，佢就話有儍人一千，足矣。「以前八十年代，賣二三十萬書係正常，依家賣一千本要開香檳慶祝啦，幾恐怖。」

「雲詩」題材可謂宇宙最廣。字裏行間，集齊幽默認真，歡笑欷歔。「有鬼，有外星人，有啲係罵政府嘅，有啲係諷刺時弊同人類嘅。讀者應該覺得我低能，但我唔介意。」然後我請他唸一首。
「秋天的落葉
是多麼的漂亮
等等
你知道
它們其實就是樹木的屎嗎」

「呢本詩集幾表達到我的搗亂、放肆、方丈。」十萬個同意。

原來雲海媽媽也是位詩人，作品偏偏盡是苦澀、悲傷、辛勞。她從前在上海法租界接受西方教育，解放後被逼來港。「佢讀書係為咗做醫生，呢個夢想突然間幻滅，我知佢唔甘心咁早嫁人，所以佢寫詩紓發感情，投稿去報館雜誌。」老一輩讀者可能知道有個筆名為「萍夢」的詩人，那就是雲海的媽媽。「『萍夢』意思係『人生如浮萍，漂泊不定；人生如夢境，虛幻迷離。」他戲言：「其實我有啲驚，若果我本書攞咗文學獎點算？點同我母親交代？」

雲海自小對詩有興趣，也源自媽媽。「大約唸中一，我媽突然有一日搵咗本唐詩同我講『阿海呢首好，你背咗佢。』我屋企真係怪誕家庭來的。」這首是劉禹錫的《烏衣巷》，講盛世也有衰落時。他覺得這詩很適合形容當下香港，於是改寫為《污糟巷》。他把最點題的一句「飛入尋常百姓家」改為「飛入沉淪百姓家」。「尾句最慘情，百姓都沉淪。香港有班人掛着正義民主旗號撈油水，太核突啦。」

覺得雲海黐線？黐得過自願沉淪的香港人嗎？

記者：葉青霞
攝影：陳健邦
場地提供：呇Qi House of Sichuan@灣仔



《雲詩三百首》足足320頁，賣$68。詩由雲海寫，題由編輯訂。編輯阿丁的題一針見血，好鬼幽默。


雲海在書中序言提到媽媽也是位詩人，但取材與自己有天淵之別。


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
重衰過長輩圖