http://hkm.appledaily.com/detail.php?guid=19841761&category_guid=4104&category=daily&issue=20161122

隔牆有耳：　　紅色商人天價競投表忠　　　民記又籌旗　小明4粒字值1,880萬 - 李八方



■紅色商人高敬德（圓圖）用1,880萬投咗小明嘅書法。 撮自場刊

吸金力無限嘅民建聯籌款晚會，又嚟嘞！民建聯噚晚喺會展筵開約60席，大家最關注嘅當然係有幾多金主自動獻身，透過競投物品以示效忠？兩年前中聯辦主任張曉明捐贈書法「駿程萬里」，世茂房地產主席許榮茂以約1,300萬投咗，估唔到今年小明食過翻尋味再獻四粒字，再以天價1,880萬成交，而呢位大水喉就係紅色商人、新恆基集團主席嘅高敬德，計落一粒字值470萬。其他建制政團恨唔到㗎嘞，鬼叫你哋唔係親生仔咩！



■小明（中）去民記籌款晚會，當然引到金主泵水。

雖然八方噚晚冇得入場，但都八到唔少嘢，譬如賣枱最貴係28萬，但有得接近西環同民建聯權力核心，幾貴都大把人爭住買。政商界則空群盡出支持，包括政務司司長林鄭、財爺曾俊華、前財爺梁錦松等，據聞有請特首梁振英，但佢身在秘魯出席APEC無法親身出席拉票。



■晚會仲拍賣咗張德江親筆簽名嘅《基本法》。

張德江簽《基本法》賣百萬晚宴當然有唱歌等娛賓節目，但大家關心嘅係小明今次一字值幾銀？佢呢次揮筆寫咗出自左丘明《鄭莊公戒飭守臣》嘅「度德而處」，八方攞到場刊，話係希望大家處事時度量自己德行。都係嗰句，書法係點唔重要，最重要畀大家睇到有幾咁愛國箒。新恆基集團主席高敬德，終以破上次紀錄嘅1,880萬天價投得。

高敬德係全國政協，不時喺左報撰文為中央護航；旗下新恆基集團子公司，喺香港為中聯辦及解放軍提供物業管理服務，當中包括軍事物業及國家駐港機構物業。

而人大委員長張德江親筆簽名嘅《基本法》，就由全國政協委員譚錦球囝囝譚鎮國以100萬投得。同為政協委員嘅許榮茂亦投咗其他拍賣品，政協常委換屆爭崩頭，唔知同拍賣舉動有冇關？而兩年前都唔肯公佈籌到幾多錢嘅民建聯，相信繼續保密，而查實民建聯兩年前籌到約6,838萬元。

李八方

[email protected]

上一則: 世道人生：　　世界看到了香港的反抗 - 李怡

下一則: 隔牆有耳：　　港龍換新look　搵霆鋒派曲奇 - 李八方