學生會喺星期五相約校方開會，討論有關中文傳意課程嘅改革事宜。科大粵語有幸獲邀出度呢次會議。校方現正考慮將 LANG 1114 同 LANG 1115 合併做一個以粵語授課，並且淨係供本地學生修讀嘅新課程，然後以呢一個三學分課程一次過涵蓋四個語言學習範疇：讀、寫（中文）、聽、說（普通話）。

校方認同以粵語授課可以推動課堂氣氛，以及協助學生學習，所以新課程可以改以粵語傳授。之不過，校方同時堅持將「學習用普通話溝通」定為中文傳意課程嘅預期學習目標（intended learning outcome，ILO），所以新課程即使用粵語教授，佢嘅「聽」同「說」兩部分始終會考核學生嘅普通話口語能力，譬如要求學生做一個普通話計分匯報。

校方認為，設計課程嘅時候大家唔應該考慮政治原因（否則學校亦唔會有英文傳意課程）。校方另外指，今次改革之所以出現，純粹係為咗填補現時 LANG1114 未有涵蓋「學習用普通話溝通」嘅呢一個漏洞。而且校方又講，之所以決定將授課語言改成廣東話，係為佢哋覺得母語教學會帶嚟更好嘅學習成效－－「如果用廣東話教，學生係更容易學到普通話嘅」，否則某啲學生可能連老師教書時所講嘅普通話聽唔明。

對於校方嘅構思，我哋向校方明言，今次公投嘅核心係「喺香港讀書所學習嘅中文理應係粵語而唔係普通話」，所以噉樣嘅課程改革並唔足以回應學生嘅訴求。校方則指「用咩語言學習」（授課語言）同「學啲咩」（教學內容）係兩回事，所以唔見得呢次改革嘅方向同公投議案一所爭取嘅「以粵語授課之中文傳意課程」有所牴觸。校方補充，若果要改動教學內容（即 ILO）嘅話，大家就需要先有更詳細嘅討論，因為現時支持取消學習普通話嘅理據未夠「sound」。

另外，我哋質問校方，點解普通話唔可以好似其他外語噉，以選修課程嘅方式，甚或係好似就業中心所提供嘅短期課程噉，畀有需要嘅學生自由選讀。校方解釋，因為宏觀嚟睇，普通話對於學生未來幾十年就業始終非常有用，所以要校方需要以必修課程嘅方式去「逼」某啲學習動力冇咁大嘅學生學習，就好似商科生都要讀基礎微積分、理工學生都要必修人文學一樣－－「因為我哋認為呢啲嘢對學生係有用。」校方又指，佢哋明白學生嘅「要求」（want），但係身為專業教育工作者，佢哋所提供畀學生嘅，理應係「需要」（need），而唔單單係「要求」－－「有啲位我哋唔可以退。」

另外就住公投議案二：「香港科技大學須開設供非粵語背景學生選修之粵語學分課程」，我哋提起曾經有德國留學生喺大字報牆貼上留言，話到「我嚟香港讀書係為咗學廣東話而唔係學普通話；點解我冇廣東話堂上？」我哋問校方，噉係唔係反映科大冇視推廣香港文化作為大學嘅目標？校方坦承「喺呢方面我哋係做得差嘅」，但礙於資於有限，佢哋真係開設唔到太多相關課程。之不過，校方同意佢哋可以喺呢方面投放更多資源，以解決現時零學分收費粵語班經常爆滿嘅問題。

總括嚟講，校方肯開辦以粵語授課嘅中文傳意課程，但唔會改變「學習用普通話溝通」呢項學習目標，而大家呢一刻可以爭取嘅，就只有壓低「學習用普通話溝通」嘅呢個部份嘅計分比重。而現時最為校方所接受嘅方案係將「聽」、「說」同「讀」、「寫」兩部分嘅計分分拆：前者只會評估學生合唔合格（pass or Fail），而後者則會將學生分等級（grading）。當然，呢啲方案仍然喺好初步嘅討論階段，校方亦表示佢哋需要更多時間去討論同決定－－最快嘅話，新課程會喺下學年開始實行。

科大粵語慶幸校方願意同學生討論點樣改革中文傳意課程。誠然，學生同校方之間需要有更多嘅溝通。之但係，校方現有嘅構思又係咪真係可以回應到學生對中文傳意課程嘅要求呢？科大粵語對此予以懷疑。不過，喺校方堅持學生要「學習用普通話溝通」嘅前提下，噉嘅構思亦只可以話係暫時「最好」嘅做法。