香港女子足球隊嘅成員，每一個都係業餘球員，佢地同好多市民一樣，日頭要返工返學，只能係放工後夜晚聚埋一齊練波，練完又要趕返屋企休息準備第二日返工返學，但係佢地從冇覺得辛苦，甚至呢種生活一過就十年、八年，好似陳詠詩、張煒琪、吳詠琴呢啲經驗豐富嘅球員應該感受最深，每一個「女港腳」都值得我地俾掌聲佢地。

喺東亞足球錦標賽中，為香港女子隊攻破關島大門既張煒琪，由2007年首次代表香港東亞錦標賽開始，每屆都有份出戰，代表香港南征北討多年難免積埋一啲傷患，但佢係七日之內踢晒三場波，對關島嗰場雖然踢中場，但有時佢會出現係後場幫手防守，又有時會衝到最前攻門，佢話細個係球隊入面獲得前輩照顧，而家大左要幫返班年輕隊友、帶住佢地踢，從冇計較自己要跑動多周圍幫，就算今次比賽前整傷左腳都要頂住上。「只要我諗住要踢好啲，唔諗住隻腳痛，就會冇事。」「煒琪」感受最深既係今次香港女子隊唔係一味死守，就算對住中華台北、韓國，只要有機會就嘗試進攻：「如果我地唔去試組織攻勢，將來出去踢其他比賽一樣唔敢做，可以進攻既話冇理由搓住然後大腳踢上去。」

香港女子隊往後嘅目標係亞洲盃外圍賽，已經踢左十五年代表隊嘅隊長陳詠詩，就從未諗過幾時已退。「我真係好鍾意好鍾意踢波。」講起足球，陳詠總係寧舍醒神，雖然今次賽前備戰果段時間公司工作都好忙、甚至星期日都要開工，但佢堅持每課訓練都要到：「球員因事缺席訓練好容易，但教練就算只得一個球員到都要去球場，諗到呢點我就唔會想缺席。」至於仁川亞運之後因為傷患而有一段時間冇踢代表隊既吳詠琴，今次一傷好亦都即刻返嚟女子隊幫手帶住啲後生女，以前輩嘅身份向後輩言傳身教。

因為熱愛、所以搏命，每個女港腳都係俾個心出嚟努力踢好場波，或者表現唔係最好，但佢地用盡每份力氣為港而戰，對得住所有香港人！女足加油！
#主場威力 #集合力量 #香港勁揪 #撐自己人 #振臂高呼 #我撐女足
https://www.facebook.com/hkleague/photos/a.485196208157332.122735.484506791559607/1354617784548499/?type=3