病毒免疫學專家蔡文力跑到獅子山共和國（Sierra Leone），為伊波拉病毒的疑似個案做化驗。源源不絕的測試樣本，每個都附帶着一條人命。


這些肚瀉、嘔血、頭暈身㷫的病人，究竟是傷風感冒，還是中了伊波拉病毒？「有幾種初時似係flu-like symptoms。到開始打噎，就知佢可能得番兩日命。」
由病發到死亡，可以在一星期之間。化驗，就是鬥快揪出喪屍的戰疫。可怕的是，就算被確診其實也無藥可治，只能隔離。伊波拉七六年首次在剛果被發現時，死亡率高達九成。今次在西非爆發，死亡率仍高達一半以上。以往伊波拉病毒走不出非洲暗黑的土地，藥廠沒興趣研發解藥和疫苗。
「雖然冇得救，但可以做supportive treatment。」脫水的就吊鹽水；為防止各種病菌乘虛而入，就用抗生素。頭痛醫頭、腳痛醫腳。能否逃出鬼門關，只能聽天由命。非洲方一日，世上已千年。面對瘟疫，今日的塞拉利昂，跟四十年前的剛果，其實沒甚分別，「可以咁講啦。好好彩，舊年開始有伊波拉的疫苗。患者周圍的人打咗，就唔會擴散。」
「又好好彩，而家好多國家都知道伊波拉有成為生化武器的potential，佢哋好努力咁研究。」一四年，兩名美國人中招，回國做白老鼠，試新藥後痊癒，「隻藥roll out時疫症已開始受控，反而唔夠病人做測試，而家都未出報告確定有冇用。希望 唔知有冇下次，有機會俾佢試到。」
科學家的「好好彩」要建基於第三世界的苦難，矛盾嗎？「睇歷史，過去四十年爆咗廿五次，以前未爆過的地方，都可以爆，一定有下次。希望經過過去一、兩年的教訓，到時個個都有準備。」
不變的，還有中、西非諸國的傳統，「疫情剛剛在塞拉利昂爆發時，有個好出名的巫師死咗。因為佢德高望重，好多人去拜祭。當地葬禮要pay respect，又攬又錫又要掂條屍。結果一個葬禮就傳染咗三百六十幾人。」
這根本是四十年前剛果的翻版：修道院為村民注射，把幾支針筒反複使用；疫症散播後，在其中一名患者的喪禮上，再來一次大爆發。「呢樣嘢真係要改。除咗教育啲人，仲要教育啲巫師。令佢哋知道伊波拉的病徵，要佢哋簽字，發現疑似個案時唔好自己醫，要送去醫療中心。」跟巫師立約，也真夠黑色幽默。
文明世界的幸運兒笑非洲人太瘋癲。問題是，當地政府不曾可靠、醫療系統不曾存在。若連僅有的「傳統智慧」都摒棄，他們連丁點憑藉也沒有，「最初冇人願意嚟醫療中心。佢哋見到你著住黃色保護衣，好似外星人。有病嘅親人被俘虜，跟住就唔見咗，係咪死咗都唔知。」
病入膏肓至神志不清、發狂逃脫的恐怕會成為生化武器，「好好彩，有一班生還者知道自己有免疫力，肯返嚟幫手。有病人逃走時，佢哋會奮不顧身咁去捉，真係好勇敢。」康復者能為醫療隊洗刷污名，「一年之後，我哋有walk-in客。」
http://nextplus.nextmedia.com/news/spot/20161112/451382