http://hkm.appledaily.com/detail.php?guid=19831287&category_guid=4104&category=daily&issue=20161112

隔牆有耳：　　黃成智搞咗份《大公B報》？ - 李八方



■《見報》嘅網站仲係寫住「建設中」。

做傳媒嘅競爭真係好大，不過仍然有人心口掛個勇字。做過立法會議員嘅黃成智有份投資嘅免費報紙《見報》噚日面世，雖然成智強調《見報》立場中立，但有3萬份嘅創刊號頭版係青年新政梁頌恆、游蕙禎嘅宣誓風波，標題係「梁游攬港陪葬」，有網民發現不論內容、文字同照片，同《大公報》一篇有關梁游報道十分相似，有網民更懷疑係照抄《大公報》。

不過點都好，自從無做議員後甚少見報嘅成智，今次成功見報。《見報》暫時以雙周報形式派發，佢話長遠嚟講係希望收錢，賣5蚊一份。

據成智所講，《見報》係佢自資嘅媒體，無幕後金主，佢自己都會幫手搵廣告，現時嘅開支就大概12至13萬1個月，而編採人員就有13個人，佢手頭上嘅資金只係夠營運1個月。

搞傳媒就係燒銀紙㗎嘞，不過成智得1個月資金的話，咪即係只可以出兩份？

上一則: 隔牆有耳：　　黃碧雲為UGL同建制開火 - 李八方

下一則: CY．Time Lies：　　國教曲線捧學民 - 李八方