係成長嘅過程中，人往往會反叛過、迷失過。

著住香港隊9號球衣嘅韋婉婷，曾經係女子足壇嘅明日之星，亦走過曲折嘅彎路，曾經兩次離開過足球，反思過後終於決心認真去踢好，廿四歲第一次係大港腳踢正選未算係遲，最緊要係諗通左要接受自己嘅不足。

細細個踢青訓有表現，之後踢女子聯賽同埋入選過香港青年軍嘅韋婉婷，當年對足球唔夠認真，就好似好多後生仔女一樣，諗住仲有大把時間，之後到美國留學，仲放棄左足球，返黎香港之後雖然入選女子省港杯大軍，但因為冇表現機會佢又一次離開左。「果段時間係迷失，但我知道一路沉淪落去只會係一條掘頭路，所以想離開下、反思下，搵到個問題係邊然後解決。」

睇返自己過往嘅經歷，韋婉婷真正發現過往未做到嘅係接受自己真係不足。「接受自己唔得、接受失敗係最難既事，而家我都算學識左少少。例如我俾波唔夠快，我可以覺得係隊友幫波唔夠快，亦可以覺得自己真係唔夠快，可能有人選擇將責任擺去人地度，但我會選擇睇自己問題係邊。」

運動員食嘅係青春飯，韋婉婷錯過左嘅時間已經追唔返，但至少佢喺過程中學識睇清自己，而家嘅佢對足球非常認真，今日對中華台北場波睇到自己好多不足，就要努力去改善，因為佢知道唔努力，年輕一輩好快就會取代佢。

足球路，前面仲有好長，廿四歲先至第一次係香港隊踢正選，或者比好多隊友遲，但係韋婉婷唔怕遲而且仲話：「最緊要係有呢個機會。」
女子賽事賽程(賽事將於香港足球會足球場舉行，免費入場)：
11月11日(星期五):
上午11時30分：香港 對 韓國；下午2時30分：中華台北 對 關島
11月14日(星期一):
上午11時30分：香港 對 關島；下午2時30分： 韓國 對 中華台北
入場方法:
日票將會於比賽當日開賽前90分鐘係香港足球會足球場公眾入口處免費派發。

https://www.facebook.com/hkleague/photos/a.485196208157332.122735.484506791559607/1347276998615911/?type=3