篇文咁長唔知你會唔會睇哂，我希望分享俾各位考完 DSE 迷惘緊既學生，讀緊 IVE / Asso 唔知自己想點既學生，或者 IVE / Asso 想升大學既學生睇 
我唔想將重點放係我自己任何一段經歷，亦都無話建議你要做 d 咩，可能每個人睇到既重點都唔同，鼓勵你地決定自己既未來，前途無你諗得咁黑暗 

故事要由我中四講起，當年我中四成績唔錯，但衰在無心向學，諗住會考 ( >16 分就升到原校既中六 ) 輕鬆 20 分升到中六就算數，有時間寧願去打機溝女 
好景不常，中五考 mock 前我同當時既女朋友分左手，搞到我無哂心機溫書，期間仲試過飲酒過夜，第二日醉哂咁番學，仲俾班主任捉左落醫療室叫我休息 ( 我諗佢知咩事，不過好多謝佢無話我，選擇相信我  ) 


[ 我上年返左中學探呢位老師，佢問我有咩好消息想話佢知 
我叫佢估下 佢第一樣野竟然估我要結婚 
我話當年令你失望，會考衰左離開左學校果個廢青，岩岩入左 HKU 讀 triple E 
我見到佢眼濕濕，仲好興奮咁介紹我師兄 (當年既電腦科老師  ) 俾我識，高考 3A 但係上堂唔知佢講咩老師  ] 



呢個頹廢狀態一路 keep 到考會考，當時我以為自己有本錢輕鬆上到中六，真係夠膽死考試前兩日先溫書，結果梗係炒撚哂啦，得15分連原校都岩岩升唔撚到 

當時既失敗者 ( 被自己學校踢左出黎個d ) 要去聯招中心，好多Band2 / 3中學一連兩日係度擺攤位收生，學生要自行去搵中六學位
當時我好撚驚，之前無諗過自己會升唔到中六，老母係電話度話請假黎陪我，我都話唔洗，因為我仲自信15分唔會無學校收，安慰自己輕鬆d 面對 
期間親朋戚友打俾我問成績，好好咁安慰我，仲叫我唔好傾拿拿臨搵學位先，搵到記住要覆返佢
不過亦都有人問我，15分升咩中六，無 20 分都升唔到大學，15分仲上去墊底  不如搵IVE 讀完做野仲著數啦
其實佢講得好岩，識得我既巴打都知我 AL 後真係入左IVE  不過當時聽到真係唔係幾開心，呢段說話好深刻 

當時原本每間學校都話收我，不過我大學想讀 Engineering，所以要揀一間有開數既學校
AL 想修讀 Applied Math / Pure Math 係學生，一定要 HKCEE Amath 合格 ( 利申：我無讀 ) 
所有學校都話只可以俾 biochem group 既offer 我，結果我行左成日都無要到任何一個 offer 
返到屋企老母問我收到 offer 未  我話未  佢屌到我上天花板，問我點解唔轉 bio group，點解有offer 都放棄
我好辛苦解釋我想讀電機工程既原因佢聽，佢知道左都無再屌我，仲話大不了去跪個校長求 offer，我聽到後衝左入房喊撚左出黎 

[ 改呢篇文睇到呢段我都眼濕濕  老母最近仲不停 whatsapp 我問我係東京夠唔夠錢用，結果我嫌佢煩隔一排先應佢  ] 

第二日我再去求下 d 老師俾我入 math group，結果完全無人理我，好彩最後有一間 band3 中既 band3，有我岩讀既科，Phy Chem Math&Stat; (M1既前身，無會考數學要求)，即屌！ 

上到中六，我即刻故態復萌，再次hea下hea下過日子，仲開左個高登AC 叫做楊冪bb，專開妹妹同埋呃腳post  中六下學期我至開始溫書，跟同學一齊去自修室，一齊揀jupas，我仲好記得當年我簡左 A1 HKU BEng, A2 PolyU Electrical Engineering, A3 HKUST Electronic Engineering，未溫書但瘋狂 FF 自己升到大學

到左中六暑假，我係自修室識左個女仔，每日放學都係自修室見，慢慢就由朋友變左女朋友，慢慢就由讀書變左傾計 (各位曾經被我嘈到既朋友 sorry ) 
一直 hea 到中7，我至發覺 d 野積積埋埋好多好難，成日溫完隔兩星期又忘記哂，Phy 理解公式都仲好d，Chem 真係背撚到仆街都唔入腦 ( 我既腦容量真係好細，非常唔擅長背書，但係理解公式就好叻 )

當時我都預計 Chem 炒硬，於是決定盡地一博，Hea Chem 爆 Phy，諗住 Phy 一隻 B 入都夠入水泡 N展，可惜人算不如天算 
我考完Chem ( 溫得兩三日，其他時間爆哂 phy ) 覺得自己盡左力，有信心合格  
點知到考 Phy 當日先出事，一個我諗都未諗過既情況出現左，我竟然緊張到手震  
後尾諗返我總結出兩個原因: 
1. 未代AL，一試定生死俾我好大壓力 
2. 我放棄Chem 博 Phy 令我承受更大既心理壓力，食粥食飯靠呢科 

我全程六個鐘，都手震住咁做卷，禁機又禁錯左好多次，有時連我自己見到個答案都估到自己禁錯機 當時全部題目都好簡單，諗都唔洗諗就做哂 
Check 卷都要對症下藥，我當時先 check 禁機，將所有步驟禁一次確定無禁錯，再睇返條題目 check 公式使用，輕鬆改返哂d小錯誤 
不過好戲在後頭，我睇睇下發覺屌佢老母我抄錯數字 
例如題目 capacitance 係 200 uF，但係計數我用左250uF......有幾題都出現同樣情況，我由part A 開始改，改改下考官話夠鐘，屌佢老母交撚左份錯哂卷有春用咩  

考完 Phy 我已經無哂心機溫 math，因為我知道自己已經與大學無緣，最後鏗哥成功以 Phy Chem MS D E E 成績入讀 HKIVE Electrical Engineering 

其實當時我收到 Space HD in Engg offer & IVE Electrical Engg offer，我老母仲走去問人 Asso 好定 HD 好，結果得到既答案係：你個仔仲考大學  公開試都柒左兩次，不如安安份份讀個 HD 出黎做野咪算囉，仲讀咩Space 呀 

我當然唔會聽佢地既意見，反而上高登問邊間好 
結果高登仔個撚個搶住認自己 IVE Distinction 升左 PolyU 大電，仲吹到走哂堂都考到 Distinction，講到好似好撚易升咁  
其實佢地無講錯，IVE 舊制既 HD 真係 Hea 撚到仆街，可惜 2012 年 IVE 改行勁 Chur 既新制HD 

而我真係抱住爆 seed 上 PolyU 大電呢個目標入 IVE HD，一黎學費平，二黎我想讀既係 Electrical Engineering 而唔係 General 既 Engineering 
我深信只要肯努力，無論讀乜都升到大學 

三黎係想剝哂班三姑六婆棚牙，你話唔好入 Asso 因為我會升唔到U哂錢，我就入IVE 升U俾你睇  
結果我真係瘋狂讀書，得閒睇下動畫，今次無溝女  [屌你老母我都依家都未撚出得返 Pool  ] 

我仲記得我會專登 Print IVE note 去自修室溫書，大大隻 VTC 印係度，我一世都記得我當時有幾柒  
結果 IVE 成績比預期好，我收到成績個陣都嚇親，GPA 3.8X  [JJ mode : 最後我 CGPA 3.80 / 4.00，我諗好多人都見過我張全 A transcript ] 

原因係 IVE 無書背，全部題目公式靠理解，考正我個飯，而且課程內容唔多，唔洗記哂所有野至一次過考 
一句講哂，呢種讀書模式岩哂我  最後我以 28A 3B 成績畢業 
當時除左老母，無人知我報左大學，因為我都唔想俾人恥笑: IVE 仔都想入大學  

結果我收到中大科大 offer 個陣，所有人望我既眼光都唔同哂，我睇到一份認同  
由不學無術，只顧玩樂既 IVE 仔，搖身一變成為三大學生 

個個都問我個陣係點溫書先考到入三大，最後我收到 HKU 既 offer 個陣仲升埋上神檯，破埋世界紀錄 
其實個過程都幾好笑，當年 Jupas 我都有報 HKU BEng，雖然兩年前我成績唔夠，但兩年後 HKU 都收返我 我記得 interview 果陣prof. 問我，兩年前 Jupas 報咩  我諗都無諗就答: HKU BEng!!!! 結果咁就收左我 

依家諗返轉頭，我發現我既夢想一個一個咁被我自己實現，一開始因為 Ken Chan 而想入電機工程，讀緊IVE 電機果陣想升返電機 degree，同埋因為當時有睇動畫而想去日本過學生生活  
依家 Year1 已經過左一半，岩岩收到 exchange nomination 去東京，一個堅持左三年既願望又被我實現左，係時候要許下另一個願望，IVY master  各位有夢想既巴打，一齊加油！ 

[利申：依家我係日本改緊呢篇文，當然識左好多日本妹，但係發現同我當時打呢篇文個陣 FF 既生活完全唔同，或者咁樣先係人生，FF 先至係最美好，但至少一路以黎我都無後悔過自己既選擇 

希望各位考得差都唔好放棄，人生係咩時候都會有機會，DSE 衰左唔等於人生已完，把握下一個機會咪得  ]