http://nextplus.nextmedia.com/news/latest/20161018/438897青年新政兩個議會新丁梁頌恆同游蕙禎，上星期喺立法會宣誓時將「China」讀成「支那」，即時刺激一眾玻璃心，更俾機會班維穩大軍群起攻之，包括全國人大代表、廣東社團聯會、港區政協委員聯誼會同全港各區婦女總會等，都有份喺星期一以愛國為名表忠為實，登報譴責兩人，論重視程度可謂直逼當日反佔中。 喺芸芸譴責之中，其中一份內容明顯唔同，佢哋聲稱來自「鴨脷洲島各界社團及居民」，強烈譴責梁頌恆同游蕙禎兩個言論係「侮辱全球華人、鴨脷洲人」，仲話「土生土長的鴨脷洲居民」對梁頌恆嘅劣行感到「憤怒、不齒、反感和噁心」；再睇個聯署譴責名單，排第一嘅熟口熟面，正係人稱「朱太」、有「殼后」之稱嘅金利豐老闆娘朱李月華。

點解「朱太」同呢件事有關？佢喺香港出世，曾經喺鴨脷洲長大，雖然早喺七十年代已經移民咗去美國三藩市，喺當地讀書結婚生仔再開始房地產生意，名副其實落地生根，但九十年代決定回流香港，仲因為自己同鴨脷洲嘅淵源，所以成日出面撐「家鄉」，年年返鴨脷洲搞盆菜宴益街坊長者，而今次個聯署，朱太就用咗鴨脷洲街坊福利會理事長名銜，其他鴨脷洲團體都統統要排佢後面。

再睇清楚個譴責廣告，其實聯署團體大部分都係「鴨脷洲各界社團」呢個組織嘅成員，背後由西環做指揮，集合地區唔同組織，有需要時就動員晒馬，亦因為咁難免良莠不齊，連曲藝社同舞研會都有份。而除咗鴨脷洲人，聯署仲搵埋十二個南區建制派議員，但當中八人所屬選區根本唔喺鴨脷洲上面，似乎有濫竽充數之嫌，反而真•鴨脷洲議員、人稱「利東孖寶」嘅民主黨羅健熙同區諾軒就冇簽名。

梁頌恆同游蕙禎講得出「支那」又辯稱係口音問題，係咪小學雞見仁見智，但睇清楚梁頌恆當日個解釋，佢話自己係「鴨脷洲家鄉口音」，而游蕙禎就係「MK口音」，暫時就未見有旺角區居民組織撲出來鬧，但呢班鴨脷洲人已經將游蕙禎當埋「自己人」鬧埋一份，可能有人要提提佢哋，「MK is not 鴨脷洲」囉！