練乙錚今日喺蘋果發文，公開呼籲黃毓民出戰特首選舉，泛民亦應該加以配合給予提名，引起軒然大波。練乙錚所持理由，主要如下：

1. 黃毓民及其支持者可以提振敗選後低迷既士氣，亦可向梁振英報擲杯官司之仇。黃毓民同泛民合作，更可以洗脫自己係共產黨臥底既污名。

2. 泛民提名黃毓民，利用其「梁振英頭號政敵」既政治能量在特首選舉中攪局。本身極度憎恨黃毓民既人，仲可以借選戰睇黃毓民「表演」，搞清楚佢係人係鬼既真面目。

睇完篇文，我覺得練乙錚相當之無恥。首先，練乙錚認識黃毓民多年，政圈流傳黃毓民收共產黨錢搞散民主派，咁耐以來，練乙錚一句公道說話都冇為黃毓民講過，咁都無所謂，你而家叫黃毓民同佢口誅筆伐左廿幾三十年既泛民政客合流，做一場特首選舉馬騮戲，去還自己清白？雖然黃毓民新近敗選，你堂堂「香港第一健筆」又何必欺人太甚？

其次，我唔知練乙錚是否代表某方勢力招安，但係叫黃毓民去選特首，實在係十分狠毒的一著。黃毓民向來對小圈子選舉深痛惡絕，不遺餘力鞭撻「為求入閘屎都食」既泛民政客。今日練乙錚公然叫陣，要求黃毓民拋棄多年來一以貫之既信念，投身小圈子選舉，如果黃毓民順從，襯家自會斥責教主晚年失節；黃毓民拒絕，襯家亦可以繼續嘲諷教主有鬼，不肯與泛民和解合作。提出呢個對黃毓民公字皆輸既遊戲，練乙錚究竟所為何事？

另外，練乙錚認為，若黃毓民同泛民協調後參選特首，競選時大可主打熱普城本身也極之關心既2047議題。呢個講法實在太搞笑。我仲記得立法會選戰期間，練乙錚係公開背書支持香港眾志、青年新政呢堆新泛民，好啦，等到主張永續基本法同公投制憲既熱普城慘敗，而家又叫黃毓民出來參選特首去宣傳2047議題，而家成個熱普城陣營係任你練乙錚一人舞來舞去？熱普城選舉失利，代表市民唔接受永續基本法同公投制憲呢條路，就算參選特首目的係在選戰中提出2047議題，練乙錚你係咪好應該叫劉小麗呢啲自決概念派去選呀？

以練乙錚智慧，我實在係無法理解佢點寫得出呢篇文章，除非壞左腦，或者有任務在身啦。

Source：自己上fb睇