http://news.mingpao.com/ins/instantnews/web_tc/article/20160927/s00001/1474950367627身係基督徒嘅新界西候任立法會議員何君堯，噚日出席大學論壇時，就被「十誡」考起，仲話「我都唔係咁虔誠嘅基督徒」，引起熱論。何君堯喺截稿前未有回覆。浸大學生會幹事會噚日喺校園舉辦候任議員嘅對談活動，邀請咗候任新界西立法會議員鄭松泰同何君堯，討論近日社會議題，包括自由黨周永勤「棄選」事件等，亦有提到當時流傳要「狙擊周永勤」的錄音聲帶主人黃四川。
台下發問環節時，浸大學生組織「浸大山神」嘅陳樂行就問何君堯，「十誡第九條你記唔記得係咩？」佢仲追問何君堯話同助選義工黃四川唔熟，言論有冇違反「十誡」等。
何君堯就回應：「黃四川佢支持我好多謝，佢係我好朋友，所以我係……一早我已經講明咗架，唔知點解你感覺我好似出賣佢咁，完全冇啲咁嘅嘢」。
陳同學追問「十誡」第九條係咩，何君堯就忽然承認自己唔係虔誠嘅基督徒，「十誡嘅嘢我諗我好難答晒你，我係基督徒，但係我都唔係咁叻仔嘅基督徒，都唔係咁虔誠嘅基督徒」。之後陳同學就為何君堯解開謎底，「第九條係不可作假見證陷害人」。
Emily記得，何君堯早前喺競選工程中，多番強調自己係基督徒，仲用「因信仰 我無懼」做口號。本身都係基督徒嘅陳樂行接受《明報》訪問時話，無諗過何君堯會答唔出「十誡」第九條，又話「十誡」係基督徒嘅常識，不滿何君堯喺選舉期間，「打住基督徒嘅旗號，但係連十誡都講唔出」。何君堯喺截稿前未有回覆。
其他報道：競逐連任？ 梁振英：有決定會通知