脫中港獨作為香港往後大方向，港人就須要擴闊行動嘅論述，而其中最重要之一就係外交。外交論述主要有兩方面需要解決︰尋求外國支援，以及脫中後爭取外國承認香港地位。然而，每當講起外交，總會有「洋奴」、「畀機會外國搵香港笨」嘅謾罵，所以小弟接下來想釐清部份觀念，希望大家思索「外交」嘅必要。

外交係以自身利益為先嘅生意
所謂向外國求援並非單純如搵friend幫忙咁簡單，外交對於每個國家係一場投資，所有外交政策必然要考慮利害，揀最符合自身最大利益嘅方案。所以香港人要求外國援助，並非單單網上聯署就足夠，更重要係展示到支援香港有何好處。(希望得到援助嘅)民意基礎固然係必須，港人同時亦要提供經濟等方面嘅利益，例如部份產業嘅經營權/ 股權，先足以打動其他國家出手。

英國主權移交時放棄香港，係香港人抵死
講起香港嘅外交論述，英國作為英中聯合聲明其中一個簽約方，必然係主要嘅求援對象。但一有人提起英國，就會聽到「英國當年都放棄咗香港啦」、「英國領事認同中國擁有香港主權喎」等等嘅句子，否定英國支援香港嘅可能。若以前一部份為基礎，上述反對者嘅論點並唔非事實全部。

前一部份講過，民意基礎對香港求援係必須。當年主權移交前，雖然香港主流係想留喺英國，但並冇形成政治力量或者對英國構成壓力。相反，香港人任由「民主回歸論」騎劫民意，喺英女皇來訪時對其咒罵，89年「六四事件」引導香港人支援中國 (而非保護自己)。既然香港人共識為無意留英，英國當然順其意，謀求之後嘅中國貿易。

結論
擴展香港外交嘅論述，香港人就要有當家做莊嘅心態︰外國對香港嘅政策要考慮香港人利益。向外求援並非十惡不赦嘅事，而係香港同外國對等嘅交易。