面臨死亡恐嚇嘅新西「票王」朱凱廸，今日喺灣仔警察總部出席舉行「停止一切威嚇維護土地公義」集會，獲大批市民到場支持。朱凱廸一開始就話：「我唔會因為立法會嘅事，而放棄係環保嘅工作，所以，我要推動唔好再玩熒光棒！」佢唔係得把口，喺接受訪問期間佢一直揸住一個充滿童趣嘅假咪玩具，上面寫明「我唔再玩熒光棒」標語，極為搶鏡。早前曾被警方當成武器庫嘅環保組織「結束一桶專棄」，今日喺fb大爆呢支假咪內幕，專頁小編上載咗一張WhatsApp截圖，顯示朱凱廸原來事前，向群組成員之一嘅日青提出，要搞個行動反對熒光棒，搞到日青忍唔住輸入3個震驚公仔，反問「竟然是你問我唔係我問你？！」專頁小編都留言話，朱凱廸依家生死未卜，「仲得閒關心有無人去『Fight低熒光棒』」，小編仲特別標籤「熒光棒既（嘅）禍害媲美官商鄉黑勾結」、「與廸同行」、「我地（哋）係結束一桶專棄電視台」及「朱凱廸係第一個夠膽羅（攞）住支假咪做訪問既（嘅）人」等。有網民留言話：「雖生命受威脅，但工作還是要繼續，這個就是朱凱迪」，有人響應呼籲，認為政府應立法禁熒光棒。早前環保組織計算，一個中秋隨時有3000萬支熒光棒被棄置，「結束一桶專棄」一直呼籲大家唔好玩，佢哋兩年前做過一個拆解實驗，3個人花咗一個鐘先拆到40支熒光棒，評估500支熒光棒含有嘅化學液體，就差不多等同Starbucks普通膠杯嘅分量，計起上嚟即一個中秋就有6萬杯化學液體倒入堆填區，其後再滲入泥土、沖入大海，真係諗吓都覺得可怕。http://m.mingpao.com/ins/instantnews/web_tc/article/20160911/s00001/1473588115596